Б.ДАРЬСҮРЭН

Хүнс, хөдөө аж ахуй, хөнгөн үйлдвэрийн яам, НҮБ-ын Хүнс, хөдөө аж ахуйн байгууллагын Монгол дахь суурин төлөөлөгчийн газар хамтран “Алсыг харъя, органикийг сонгоё” уриатай “Органик бүтээгдэхүүний үнэ цэн” чуулганыг зохион байгууллаа. Чуулганд органик хүнс, хөдөө аж ахуйн эрхзүйн орчныг сайжруулах, органик үйлдвэрлэгчдийн өмнө тулгараад байгаа асуудлаа хамтран шийдвэрлэх зорилгоор тус салбарын хөгжилд санаа чилээж, ухаан бодлоо уралдуулах 300 орчим оролцогч танхимаар болон цахимаар оролцсон юм. 

УИХ-ын гишүүн Ч.Ундрам, Т.Энхтүвшин, Т.Аубакер нарын санаачлан боловсруулж байгаа Органик хүнсний тухай хуульд нэмэлт, өөрчлөлт оруулах хуулийн төслийг сонирхогч талуудаар хэлэлцүүлэх, гаргасан саналыг тусгах зорилгоор энэхүү чуулганыг зохион байгуулж, хэлэлцүүлэг өрнүүлсэн юм. Мөн төрийн зүгээс органик үйлдвэрлэгчдэд ямар дэмжлэг, урамшуулал үзүүлэх вэ гэдгийг хэлэлцэж, чиглэлээ тодорхойлох нь энэхүү арга хэмжээний гол зорилго аж. 

Органик хүнсний тухай хуульд нэмэлт, өөрчлөлт оруулах хуулийн төсөлд органик үйлдвэрлэгчдэд дэмжлэг, урамшуулал үзүүлэх талаар дараах байдлаар тусгасныг чуулганы үеэр хэлэлцүүллээ. Үүнд, 

• Органик үйлдвэрлэлд шилжихэд шаардагдах баталгаажуулалтын зардал, дотоодод үйлдвэрлэсэн органик бордоог тариалангийн талбай, хүлэмждээ ашиглаж байгаа тариалангийн анхан шатны органик үйлдвэрлэл эрхлэгчийн бордоо худалдан авсан эхний гурван жилийн зардлыг санхүүжүүлэх, 
• Сургуулийн өмнөх болон ерөнхий боловсролын сургуулийн дэргэд органик туслах аж ахуйг хөгжүүлэхэд дэмжлэг үзүүлэх, 
• Органик бүтээгдэхүүнийг экспортолсон тохиолдолд үйлдвэрлэл эрхлэгчийн хөрөнгө оруулалтад зориулан арилжааны банкнаас авсан зээлийн 50-аас доошгүй хувьд хүүгийн дэмжлэг үзүүлэх, 
• Дэвшилтэт арга, технологи нэвтрүүлж нутагшуулан шинэ нэр төрлийн органик бүтээгдэхүүн үйлдвэрлэж нийтийн хэрэгцээнд нийлүүлсэн тохиолдолд судалгаа, хөгжилд зарцуулсан зардлын 75 хүртэлх хувьтай тэнцэх дэмжлэгийг нэг удаа улсын төсвөөс олгох, 
• Органик бүтээгдэхүүнийг үйлдвэрлэсэн буюу тариалсан аж ахуйн нэгжийн зөвхөн тухайн бүтээгдэхүүнээс олсон орлогод ногдох албан татварыг 90 хувиар хөнгөлөх,
• Органик бүтээгдэхүүнийг  дамжуулан борлуулж байгаа этгээдийг нэмэгдсэн өртгийн албан татвараас чөлөөлөх зэргээр органик үйлдвэрлэл эрхлэгчид татварын хөнгөлөлт, чөлөөлөлт үзүүлэх

Мөн Монгол органик бүтээгдэхүүн дэлхийн зах зээл рүү гарлаа, Олон улсын органик хөгжил ба Монгол Улс, Органик хүнсний тухай хуулийн хэрэгжилтийн үр нөлөөний судалгаа, Органик бүтээгдэхүүний үйлдвэрлэл, цаашдын хандлага, Органик хүнсний үнэ цэнийг нэмэгдүүлэх нь, Органик сүү, сүүн бүтээгдэхүүний үйлдвэрлэл “Монгол як” төслийн танилцуулга, Сэлэнгэ Органик брэнд Өртгийн сүлжээ-Давуу тал зэрэг сэдвээр оролцогчид мэдээлэл хийж, илтгэл танилцууллаа. 

Эх сурвалж: www.polit.mn