Б.ДАРЬСҮРЭН

Хөгжлийн банкинд энэ оны нэгдүгээр сарын 20-ноос есдүгээр сарын 30-ны хооронд нийт 766.5 тэрбум төгрөгийн зээлийн эргэн төлөлт хийгджээ. Үүнээс бэлэн мөнгөөр 668.8, өмчлөх бусад үл хөдлөх хөрөнгөөр 97.7 тэрбум төгрөгийн зээл төлөгдсөн байна. Мөн 14 зээл хаагджээ.

Хөгжлийн банк одоогийн байдлаар нийт зээлийнхээ 52.3 хувь буюу 23 зээлдэгчийн нийт 1.5 их наяд төгрөгийн зээлийг цементийн үйлдвэр, арматурын үйлдвэр, газрын тосны үйлдвэр, барилга барих үйлдвэр, гурилын үйлдвэр, малын гаралтай түүхий эд үйлдвэрлэх үйлдвэр зэрэг боловсруулах үйлдвэрт олгосон байна. 

Барилга, дэд бүтцийн салбарт 12 зээлдэгчийн нийт 580 тэрбум төгрөгийн зээлийг олгожээ. Тэдгээрээс дурдвал, "ТОСК"-ийн 2910 айлын орон сууц, 1100 авто зогсоолын “Буянт Ухаа-I,II”, "Шинэ яармаг хороолол" төсөл, “Пирамид орд” ХХК-ийн 296 айлын “Буман залуус” орон сууцны төсөл, "Бармон" ХХК-ийн 468 айлын “Шинэчлэл хороолол төсөл”, “Эрдэнэс Монгол” ТӨХК-ийн “Тавантолгой-Гашуунсухайт чиглэлийн авто замын төсөл”, “Шанх майнинг” ХХК-ийн “Тээвэрчдийн хотхон барих төсөл”, “Түгээмэлтүмэн хишиг” ХХК-ийн “Тайван зогсоол барих төсөл” зэрэг байна.

Эрчим хүчний салбарт дөрвөн зээлдэгчид нийт 385.2 тэрбум төгрөгийн зээлийг өгчээ. Тодруулбал, “Эгийн голын усан цахилгаан станц” ТӨХХК-ийн “Эгийн голын усан цахилгаан станц байгуулах төсөл”, ЭХЯ-ны “Таван толгой дулааны цахилгаан станцын төсөл”, ДЦС-4 ТӨХК-ийн “Суурилагдсан хүчин чадал цахилгаанаар 86 МВт нэмэгдүүлэх төсөл”, “Чойбалсангийн дулааны цахилгаан станц өргөтгөх төсөл” багтаж байгаа юм.

Хөгжлийн банк нь Олон улсын зээлжих зэрэглэл тогтоогч FitchRatings, Moody’s Investors service, Standard & Poor's Ratings services зэрэг байгууллагуудаар үнэлүүлдэг. Есдүгээр сарын 30-ны байдлаар Moody’s агентлаг Хөгжлийн Банкны зээлжих зэрэглэлийг "B3 тогтвортой" түвшинд хэвээр хадгалснаа мэдэгдлээ. Харин Fitch, S&P агентлагууд нь найм, есдүгээр сард Монгол Улсын Хөгжлийн банкны зээлжих зэрэглэлийг мөн адил хэвээр хадгалсан. Ингэснээр олон улсын нэр хүнд бүхий зээлжих зэрэглэл тогтоогч агентлагууд Хөгжлийн банкны зэрэглэлийг Засгийн газрын зэрэглэлтэй адил түвшинд үнэлсэн юм.

Засгийн газар болон Хөгжлийн банкны бондын эргэн төлөлтийн мэдээллийг доорх графикаар танилцуулж байна.

Эх сурвалж: www.polit.mn