Б.ДАРЬСҮРЭН

Төмөр замын салбарт тулгамдсан асуудал, гарц шийдлийн талаар санал солилцох уулзалтыг өнөөдөр /2022.10.04/ Зам, тээврийн хөгжлийн сайд С.Бямбацогт зохион байгууллаа.

Тэрбээр ”Өнөөдөр Улаанбаатараас Эрээн ороход нэг вагон дунджаар 3000 тонн ачаа 100 орчим сая төгрөгийн тарифтай. Чойроос Эрээн ороход нэг вагон 70 сая орчим төгрөг байна. Гурван тонн ачааг 70 сая төгрөгт хуваахаар бага тариф гарна.  

"Улаанбаатар төмөр зам" ХНН-ийн тариф бага учраас төмөр замын тарифтай холбоотойгоор импортын барааны үнэ өсөөгүй. Цементийг энэ тарифаар ачих бүрэн боломжтой. БНХАУ-аас зөвшөөрөл олгогдоогүйгээс хугацаа алдсан. Задгай тээвэр зогсож, чингэлэг тээвэр хийж буйтай холбоотойгоор бараа бүтээгдэхүүний үнэд өөрчлөлт орж байгаа учраас Замын-Үүд-Улаанбаатар чиглэлд тээврийн үнийг нэмэх асуудлыг судалж байна.

Түүнчлэн Улаанбаатар-Эрдэнэт чиглэлийн нийтийн вагон 8100 төгрөгөөр явж байхад, автобус 30000 төгрөгөөр явж байна. "Улаанбаатар төмөр зам" ХНН-т энэ мэт ачааг олон жил үүрүүлж ирсэн. 

Эхний ээлжид бид үе шаттайгаар нэмэгдүүлнэ. Ингэхдээ экспортын ачаа, транзит тээврийн тарифыг илүү нэмье гэж байгаа. Үүнээс бий болгосон ашгаараа "Улаанбаатар төмөр зам" ХНН-ийн парк шинэчлэлийг хийж, техник технологийг сайжруулна. Мөн албан хаагчдын цалинг нэмэх шаардлагатай” гэв.

Эх сурвалж: www.polit.mn