Б.ДАРЬСҮРЭН

Гурилын үнэ өсөх болсон талаар үйлдвэрлэгчдийн төлөөлөл мэдээллээ.

Энэ үеэр Монголын гурил үйлдвэрлэгчдийн бодлого төлөвлөгөөний гүйцэтгэх захирал Н.Мөнхсүрэн “Монгол Улсад нийт 70 орчим гурилын үйлдвэр бүртгэлтэй байгаагаас 2021 онд 12 үйлдвэр үйл ажиллагаа явуулж байсан бол энэ оны байдлаар найман үйлдвэр тогтвортой бусаар үйл ажиллагаа явуулж байна. Тус найман үйлдвэр нь 1000 орчим хүнийг ажлын байраар хангаж, 900 мянган тонн  улаан буудай тээрэмдэх хүчин чадалтай.

Гурил үйлдвэрлэлийн салбарыг ярихын тулд эхлээд улаан буудай буюу түүхий эдийн талаар ярих шаардлагатай байдаг. Нэг тонн улаанбуудайгаас 75 хувь нь гурил, 25 хувь нь хивэг болж гардаг. Мөн улаан буудайн чанараас хамаарч дээд болон I, II гурил гэсэн ангилалтайгаар бүтээгдэхүүн гардаг. Дотоодын зах зээл 340 мянган тонн улаанбуудай болон 240-260 тонн гурилын хэрэгцээтэй байдаг. Сүүлийн таван жилд дотоодоосоо 60-70, бусад улс орноос 30-40 хувийг худалдан авч түүхий эдийнхээ хэрэгцээг хангасаар ирсэн.

Өнгөрсөн жил бид улаан буудайг 700 төгрөгөөр худалдан авч нэгдүгээр гурилыг 1000-1100 төгрөгөөр борлуулж байсан. Газар тариалангийн холбооноос улаан буудайн өртөг нэмэгдсэнтэй холбогдуулж гурилын үнээ зарласан. Улаанбуудайн үнэ яагаад нэмэгдсэн бэ гэвэл улаан буудайн тарьдаг үр 980 мянга байсан бол 1.4 сая төгрөг буюу 15, бордоо 1.8 сая байсан бол гурван сая төгрөг болж 110, шатахууны үнэ 50 хувиар нэмэгдэж, ажиллах хүчний зардал нэг дахин өссөнтэй холбоотой.

Газар тариалангийн холбооноос 1.2 сая төгрөг буюу 71 хувийн үнийн өсөлтөө нийтэд зарлаж, боловсруулах үйлдвэрт албан ёсоор мэдэгдсэн. Үүнтэй холбогдуулан боловсруулах үйлдвэрийн ажиллах хүчний зардал 20, техник хэрэгсэл урсгал зардлын өртөг 20, нийтдээ үйлдвэрлэлийн зардал 40 хувиар өссөн. Иймээс бид 1.2 сая төгрөг гэсэн үнэд тулгуурлан үзэхэд гурилын үнэ 50 хувиар нэмэгдэх буюу улаан буудайн үнэ 1.6-1.8 сая хүртэл үе шаттайгаар өсөх нөхцөл байдал үүссэнийг ард иргэд харилцагч нартаа албан ёсоор мэдэгдэж байна” хэмээн ярилаа.

Эх сурвалж: www.polit.mn