Б.ДАРЬСҮРЭН

Нүүдлийн мал аж ахуйд учирч буй бэлчээр хомстох, ган, зудын байдлын давтамж зэрэгт малчин өрхийн эрсдэл даах чадварын дундаж индекс 40.28 хувьтай байна. Энэ нь нийт сум, нийслэлийн захын дүүрэг бүрээс 30 малчин өрхийг хамруулан нийт 10 мянган малчныг оролцуулсан судалгааны дүн юм. Энэ талаар НҮБ-ын Хүнс, хөдөө аж ахуйн байгууллагын суурин төлөөлөгчийн газрын зөвлөх С.Жигжидпүрэв танилцууллаа.

Тэрбээр "Малын тоо, бэлчээрийн даац, хүртээмжийн байдал бүгд тэнцүү байснаар малчдын амьжиргаа тогтвортой байна" гэдгийг онцолсон юм. Тиймээс уур амьсгалын өөрчлөлтөд эрчимжсэн, ухаалаг байдлаар мал аж ахуй эрхлэх гурван тулгуурт зорилт тулгараад буйг тодотголоо. Үүнд:

• Хэрэглэгч-үйлдвэрлэгч, үйлдвэрлэлийн бүтээмж, үр ашгийг тогтмол нэмэгдүүлэх,
• Уур амьсгалын өөрчлөлтөд дасан зохицох, даван туулах чадварыг нэмэгдүүлэх,
• Хүлэмжийн хийн ялгарлыг боломжийн хэрээр багасгаж арилгах явдал тулгарч буйг хэлж байна.

Мөн өнөөдөр байдал ямар байна гэвэл малчид зээл авлаа гэхэд төлөх чадвараа тооцох боломжгүй эрсдэлтэй учирдаг. Ийм эрсдэлүүдийг багасгахын тулд малчид наад зах нь даатгалд хамрагдаж байх хэрэгтэй байна гэдгийг тэмдэглээд, ингэхдээ холбогдох байгууллагууд даатгалын шаардлагыг малчдад зориулан багасгах хэрэгтэй байгааг хэлж байв.

“Шинэ өсөлт” сэтгүүлийн эрхлэгч И.Отгонжаргал хэлэхдээ “Өнөөдрийн уулзалтыг “Мэдрэмжтэй мэдээлье” нэгдлийн хүрээнд, нийгэмд эмэгтэйчүүдийн оролцоог дэмжин нэмэгдүүлэх, хэвлэл мэдээллийн хэрэгслээр тэдний дуу хоолойг хүргэх зорилгоор зохион байгуулж буйг тодотгож, хөдөө аж ахуйн салбар дахь эмэгтэйчүүд, эрдэмтэн, судлаачдыг оролцуулан малчдын амьжиргааны тулгуур асуудлыг хөндлөө" гэв.

Эх сурвалж: www.polit.mn