Б.ДАРЬСҮРЭН

Коксжих болон эрчим хүчний нүүрсний эрэлт хэрэгцээ өсөн нэмэгдэж байна. Дэлхий дахинд өрнөж буй геостратегийн өөрчлөлт эрчим хүчний гол эх үүсвэр одоогоор нүүрс хэвээр гэдгийг улам тодотгов. Нүүрсээр эрчим хүч үйлдвэрлэх төслүүд дахин хөрөнгө оруулагчдын анхаарлын төвд орж эхэллээ.

Нүүрсний үйлдвэрлэлээ нэмэгдүүлэх, удааширсан төслүүд амилах боломж улс орнуудад бүрдэж байна. Гэвч тээвэрлэлтийн хүндрэл, хил гаалийн нөхцөл байдал манай улсын хувьд хамгийн том сорилт дагуулна.

Монголын нүүрсний өрсөлдөх чадварыг нэмэгдүүлэх, шинэ техник технологийг танилцуулах, тулгамдсан асуудлыг шийдвэрлэх, зах зээлийн тоглогчид хамтран ажиллах боломжийг олгодог нүүрсний салбарын худалдаа, хөрөнгө оруулалтын олон улсын “Coal Mongolia 2022” чуулга уулзалт энэ сарын 7,8-ний өдөр "Shangri-La" зочид буудалд “Сэргэлтийг хамтдаа” уриан дор болох гэж байна. 10 дахь удаагийн “Coal Mongolia” чуулга уулзалт зургаан хэсгээс бүрдэх аж. Гурав дахь хэсэг нь “Нүүрсний зах зээл ба дүн шинжилгээ” сэдвээр үргэлжилнэ.

Тус хэсэгт “Ногоон шилжилт-Коксжих нүүрсний ирээдүй” болон “Азийн зах зээл дэх Монголын нүүрсний эзлэх байр суурь, боломжууд” сэдвээр хэлэлцэх юм. Мөн “Металлургийн нүүрсний зах зээлийн чиг хандлага”-ыг энэ хэсэг тодорхойлох төдийгүй “Цар тахлын дараах Хятад, Монголын нүүрсний зах зээлийн төлөв байдал”-ыг танилцуулахаар байна.

Манай улс оны эхний долоон сарын байдлаар 11 сая тонн нүүрс экспортолжээ. Тэгвэл “Цар тахлын дараах Хятад, Монголын нүүрсний зах зээлийн төлөв байдал, цаашдын чиг хандлага” сэдвээр “Түдэй Тинк Танк” ХХК-ийн Ерөнхий менежер Хөү Жихуа БНХАУ-аас цахимаар илтгэх юм.

“Түдэй Тинк Танк” ХХК нь “Coal Mongolia” олон улсын чуулга уулзалтын онцлох илтгэлийг хэлэлцүүлж ирсэн. Коскжих болон эрчим хүчний нүүрсний зах зээлийн өнөө болон дунд, урт хугацааны төлөв байдлыг бүрэн зураглах “Нүүрсний зах зээл ба дүн шинжилгээ” хэсгээр чуулга уулзалтын эхний өдрийн хуралдаан өндөрлөх юм.

Эх сурвалж: www.polit.mn