Б.ДАРЬСҮРЭН

УИХ-ын Эдийн засгийн байнгын хороо хуралдаж байна. Хуралдаанд УИХ-ын дарга Г.Занданшатар мэдээлэл өгөв. Тэрбээр "Цагийн байдал ороо бусгаа, зах зээлийн байдал тогтворгүй хүнд байна. Хойд хил олон улсын нөхцөл байдлаас шалтгаалж хязгаарлалттай байгаагийн улмаас бараа бүтээгдэхүүний нийлүүлэлт доголдохын зэрэгцээ, Европын чиглэлийн тээвэрлэлт саатсан. Энэ нь үнийн өсөлтөд нөлөөлж байна.

Долдугаар сарын байдлаар инфляц 15.7 хувь болсон. Өмнөх сартай харьцуулахад 0.4 хувиар буурсан. Ажлын хэсэг илүү сайн ажиллах хэрэгтэй. Цаашдаа экспортоо өргөжүүлэх, хилийн боомтын сэргэлт, гадаад худалдааны бодлогыг сайжруулах шаардлагатай. Манай гадаад худалдаа боомтын бодлогоос авахуулаад импорт, экспорт хоёулаа зохицуулалтгүй урсгалаараа явж байна. Бид хүнснийхээ 50 хувийг л хангаж байна. Хойд хөрш 90 хувийг дангаараа хангадаг. Тиймээс даацтай бодлого хэрэгтэй.

Халамжийг хавтгайруулахаа больж, зорилтот бүлэгт шилжүүлье.

Дэлхийн банкны тооцооллоор үнэ ханш, хэрэглээний зардал 10 хувиар өсөхөд 411 мянган хүн ядуурлын шугамны доогуур орно гэсэн байдаг. Тэгэхээр инфляц 15 хувь байхад энэ нь ямар байх нь ойлгомжтой. Үндсэндээ өргөн хэрэглээний бараа бүтээгдэхүүний үнийн өсөлт 20 хувьтай байна. Зорилтот бүлэгт яаж нөлөөлж буй нь ойлгомжтой. Тиймээс халамжийг хавтгайруулахгүйгээр зорилтот бүлэгт шилжүүлж, ажил эрхлэлтийг дэмжье" гэлээ.

Эх сурвалж: www.polit.mn