Казахын ард түмний дунд "Тавин жилд улс шинэчлэгдэнэ" хэмээн зүйр үг бий. Гэвч шинжлэх ухаан, технологи асар их хурдацтай хөгжиж буй өнөө цагт улс орны хөгжил дэвшил тавин жил бус 25 жилийн хугацаанд тодорхой харагдаж болно гэдгийг Казахстан нотлов. Энэ жил Казахстан Улсын тусгаар тогтнолын 30 жилийн ой тохиож байна. Энэхүү 30 жилийн хугацаанд Казахстаны эдийн засаг бүрэн төлөвшиж, улс төр, нийгмийн салбарт асар их амжилтад хүрсэн төдийгүй олон улсын тавцан дахь нэр хүнд нь өссөн билээ. Тухайлбал, үзэсгэлэнт нийслэл Нур-Султан хотын шав шинээр тавигдаж, хурдацтай баригдаж эхэлсэн нь казах түмнийг дэлхий нийтэд таниулсан түүхэн чухал үйл явдал байлаа. Мэдээжийн хэрэг БНКазУ-ын Анхны Ерөнхийлөгч – Улсын тэргүүн Нурсултан Назарбаевын манлайлал дор олон тодорхой зорилт, хөтөлбөрүүд хэрэгжиж, томоохон ололт амжилтад хүрсэн юм.

БНКазУ-ын Анхны Ерөнхийлөгч – Улсын тэргүүн Нурсултан Назарбаевын санаачилгаар хэрэгжиж буй "Ирээдүйн чиг баримжаа: оюун санааны шинэчлэл" хөтөлбөр нь даяаршлын эрин үед Казах түмэн хийгээд тус улсын иргэн бүрийг ирээдүйд хөтлөх тодорхой замыг харуулж өгсөн юм. Энэхүү хөтөлбөрт тусгагдсан улс төр, эдийн засгийн шинэчлэлийг хэрэгжүүлэхийн тулд хамгийн хэрэгтэй зүйл болох оюун санааны шинэчлэл буюу олон нийтийн ухамсрын өөрчлөлт нь ирээдүйн нийгмийн хэрэгцээг хангах маш чухал үндэсний хөтөлбөр болсон хэмээн харж байна.

Хүний капиталын шинэ чанарыг бий болгох зорилтын хүрээнд орчин үеийн шаардлагад нийцсэн боловсролын тогтолцоог шинэчилж, багш нарын ур чадварыг дээшлүүлж, үндэсний түүх, хэл, соёлоо мэдэж түүнийг дээдэлдэг мөн гадаад хэлийг өндөр түвшинд эзэмшсэн алсын хараатай иргэнийг төлөвшүүлэх явцад бас томоохон амжилтад хүрч чадсан билээ.

"Аж үйлдвэрийн дөрөв дэх хувьсгалын үеийн хөгжлийн шинэ боломжууд" сэдэвт ард иргэдэд хандсан илгээлтээрээ Казахстаны дэлхийд өрсөлдөх чадварыг нэмэгдүүлэх цорын ганц арга зам нь аж үйлдвэрийн хувьсгалт өөрчлөлт хийх болон оюун санааны шинэчлэлийн асуудал гэдгийг тодорхойлж, энэхүү чиглэлд зорьсон зорилгодоо хүрч эхлэв. Ялангуяа Казахстаны ДНБ жилээс жилд өсч, ажилгүйдлийн түвшин буурч байна.

 Казахстан Улс НҮБ-ын Аюулгүй байдлын хорооны гишүүн болж, дэлхий нийтийн асуудлыг шийдвэрлэхэд өөрийн хувь нэмрээ оруулан улмаар Ерөнхий зөвлөлийн байр сууринд очсон нь тус улсын олон улсын тавцанд эзлэх байр суурий тод харуулж буй илрэл гэдгийг тэмдэглэх нь зүйтэй. Нурсултан Абишевич олон улсын болон бүс нутгийн тулгамдсан зарим асуудлын хүрээнд улс хоорондын харилцааг холбогч санаачилга гаргасныг бид мэдэх билээ. Түүнчлэн Казахстан улс хилийн чанад дахь элэг нэгтнүүддээ түүхэн эх орондоо шилжин суурьших нөхцөлийг бүрдүүлж өгснөөс гадна улс доторх олон үндэстнүүдийнхээ уламжлалыг хадгалан үлдэхэд таатай нөхцлийг бий болгож, ард түмнийхээ хамтын ажиллагааг бэхжүүлэх хүрээнд олон улсын түвшинд үлгэр жишээ үзүүлж чадсан юм. Нурсултан Назарбаевын энэхүү амжилт нь түүний энх тайван, эв найрамдлын томъёолол болж дэлхийд танигдсан явдал юм.

Тусгаар тогтнолын жилүүдэд Казахстан Семипалатинскийн цөмийн туршилтын талбайг хааж, олон улсын нэр хүндтэй байгууллагуудын гишүүнээр элссэн төдийгүй эдгээр байгууллагуудыг даргалж, Нур-Султан хотод өндөр дээд хэмжээний уулзалтууд зохион байгуулж, 1993 оноос хойш "Болашак /Ирээдүй/" хөтөлбөрийн хүрээнд казах оюутнуудыг гадаадын их, дээд сургуулиудад сургаж, Казахстаны хүн амын тоог 19 саяд хүргэж, спортын болон бусад олон улсын томоохон арга хэмжээнүүдийг зохион байгуулах зэрэг олон амжилтуудад хүрч чадсан юм.

Казахын ард түмний сайн сайхны төлөө Казахстан Улс цаашид улам их амжилтуудад хүрэхийн ерөөлийг өргөн дэвшүүлье!

Агыпарын Бакей

Монгол Улсын Шинжлэх Ухааны Академийн академич,

Эдийн засгийн ухааны доктор

Эх сурвалж: www.polit.mn