Б.ДОЛЖИНЖАВ

Цар тахлын  халдвар оргилдоо хүрч, үндэстэн даяар хөл хорио тогтоох үеэр 2020 оны нэгдүгээр улиралд 6.8 хувиар буурч байсан Хятадын эдийн засаг  энэ оны нэгдүгээр улирлын байдлаар 18.3 хувиар өсжээ. Энэ нь 1992 оноос хойших тус улсын дотоодын нийт бүтээгдэхүүний хамгийн том өсөлт юм. Ройтерс агнетлагаас явуулсан санал асуулгаар энэ дүн 19 хувь болж нэмэгдэх магадлалтай гэсэн урьдчилсан таамгийг шинжээчид гаргасан байна.

Энэ талаар Хятадын Үндэсний статистикийн хороо “Дээрх дүн манай улсын эдийн засгийн сайн эхлэл боллоо. Гэхдээ COVID-19 халдвар одоо ч дэлхий даяар тархаж, олон улсын эдийн засгийн байдал тогтворгүй, нэлээд хэцүү байх нь тодорхой байгааг бид ухамсарлах ёстой” гэж мэдэгдэв. 

Эдийн засгаа сэргээхийн тулд бизнес эрхлэгчдээ тогтмол дэмжсэн

Гэхдээ өнгөрсөн жил тус улсын эдийн засаг цар тахлын улмаас хямарсан үетэй одоогийн өсөлтийг харьцуулах нь тийм ч зохистой биш хэмээн судлаачид үзэж байна. Тухайлбал, аж үйлдвэрийн орлого гуравдугаар сард 14 хувиар өссөн бол жижиглэн худалдааны дүн 34 хувиар өссөн байна. Энэ талаар Оксфордын Эдийн засгийн хүрээлэнгийн ажилтан, Азийн шилдэг эдийн засагч Лоуис Куижс “Эхний хоёр сард тааруу байсан аж үйлдвэрлэл, хэрэглээ, хөрөнгө оруулалтууд бүгд гуравдугаар сард үр ашгаа өгснийг бид харж байна” гэлээ.

 Харин зарим шинжээч Засгийн газрын төсөв, мөнгөн дэмжлэг буурснаас шалтгаалан эдийн засгийн байдал буурах магадлалтай гэдгийг анхааруулав. “Economist Intelligence Unit” судалгааны байгууллагын Хятадын эдийн засагч Ю Сү “Гадаад худалдааны тэнцэл, дотоодын үйлдвэрлэлийн энэ өсөлт дотоодын эдийн засгийг сайжруулахад анхаараагүйн улмаас удаан үргэлжлэхгүй байж магад” гэв. Хятад улс цар тахлын улмаас хямарсан эдийн засгаа сэргээхийн тулд тасралтгүй арга хэмжээ авч, бизнес эрхлэгчдээ яаралтай тусламжийг үзүүлсээр ирсэн билээ.

Эх сурвалж:BBC