А.МАРАЛМАА

Нийслэлийн Засаг даргын захирамжаар энэ оны гуравдугаар сарын 5-наас “Хотын соёл” олон нийтийн аян хэрэгжиж эхэлсэн. Энэ талаар Нийслэлийн соёл, урлагийн газрын Урлагийн хэлтсийн дарга Э.Цэнд-Аюушаас тодрууллаа.

-“Хотын соёл” аяны хүрээнд хэрэгжүүлсэн ажлуудаа танилцуулахгүй юу?

-Нийслэлийн засаг даргын захирамж гарч “Хотын соёл” бүх нийтийн аянг өрнүүлж байна. Энэ хүрээнд хэд хэдэн ажил төлөвлөж, хэрэгжүүллээ. Аяны хүрээнд хийсэн нэг том арга хэмжээ бол нийслэлийн бүх хороодод олон нийтийн цагдаа ажиллаж эхэлсэн. Өмнө нь цөөн тооны олон нийтийн цагдаа, хорооны нийгмийн ажилтан, хэсгийн ахлагч нар ажиллаж байсан бол нийгмийн ажилтан, хэсгийн ахлагч нарыг албан ёсоор олон нийтийн цагдаагийн статустай болгосон. Ингэснээр Нийслэлийн хэмжээнд 2000 орчим олон нийтийн цагдаа иргэдийн соёлд анхаарч ажиллаж байна. Мөн хүүхэд, залуучуудад “Хотын соёл” аянаа танилцуулах зорилгоор онлайн наадмыг “Жи энтертаймент” компанитай хамтран зохион байгуулсан. Мөн Нийслэлийн соёлын элч нарыг ажиллууллаа. Соёлын элч нар нь олны танил 75 хүнтэй гэрээ байгуулж, бүтэн жилийн хугацаанд хотын соёл, олон нийтийн аяны хүрээнд ажиллах юм. Энэ хүмүүс “Хот соёлтой бол гоё” уриан дор өөрсдийн үзэл бодол, саналуудаа контентоор хүргэж байна.

-Вирус гарсантай холбоотойгоор жил бүр болдог арга хэмжээнүүдийг хэрхэн зохион байгуулахаар төлөвлөж байна вэ?

-Нийслэлийн соёл, урлагийн газраас жилд 10-аад томоохон соёл, урлаг олон нийтийн үйл ажиллагааг зохион байгуулдаг. Энэ жилийн хувьд цар тахал гарсантай холбогдуулан УОК, НОК-ын зөвлөмжийн дагуу олон нийтийн үйл ажиллагаанууд цуцлагдсан. Харин эсрэгээрээ бид олон улсын жишигт нийцүүлж телевизийн суваг, цахим хуудсыг ашиглан үйл ажиллагаануудаа онлайнаар зохион байгуулах боломжийг хайж байна. Мөн улсын баяр наадмын үеэр иргэдэд хүргэх “Монгол өв соёл” нэртэй онлайн тоглолтыг бэлтгэж байна. Үүнд язгуур урлагийн алдартай уран бүтээлчид, соёлыг өвлөн уламжлагчдын нэгдсэн тоглолт багтах юм. Үндэсний урлаг соёлын биет бус өвийг сурталчилан таниулсан энэ тогтолтыг НЗДТГ, Нийслэлийн соёл, урлагийн газар хамтран зохион байгуулж байна.

-Аяны хэрэгжүүлэгч байгууллагын зүгээс иргэдэд өгөх уриалга?

-Хотын соёл өргөн цар хүрээтэй ойлголт. Иргэн бүр өглөө сэрээд тухайн өдрийнхөө амьдралтай хөл нийлүүлэхээс эхлээд орой унтах хүртэлх бүх хугацаанд хотын соёл хамт явдаг. Бидний хийж байгаа ажлууд зөвхөн нөлөөллийн ажил юм. Тиймээс иргэдийн ухамсар соёлын асуудал болж байна. Иргэд хэдий чинээ хариуцлага, соёл, ухамсартай байна төдий чинээ хотын соёл нэмэгдэнэ.

Эх сурвалж: "Зууны мэдээ "сонин