Т.БАТСАЙХАН

УИХ-ын чуулганы нэгдсэн хуралдаанаар Цусны донорын тухай хуулийн төслийг хэлэлцэн гишүүдийн олонх дэмжсэнээр холбогдох байнгын хороонд шилжүүлэв.  Энэ үеэр гишүүд ажлын хэсгийн гишүүдээс асуулт асууж хариулт авав.

УИХ-ын гишүүн Б.Уянга:

-Цусны донорын идэвхтэй нас 24-40 нас байна. Цусны нөөц хүрэлцээтэй байна уу. Хууль батлагдсанаар цусны донорын тоо өсөх үү?

Ажлын хэсэг:

-Цусны нөөц байнгын болон гамшгийн үеийн нөхцөл гэсэн хоёр ангилалтай явдаг. Өнөөдрийн байдлаар байнгын үеийн буюу 10-14 хоногийн түвшинд хангалттай байна. Гамшгийн үеийн нөөцийг нэмэгдүүлэх шаардлага байгаа. Хууль батлагдсанаар гамшгийн үеийн нөөц нэмэгдэх ач холбогдолтой. 2025 оны тоо баримтаар авч үзвэл, 46723 цус өгөлтийн тоо байна. Үүний 80 хувь нь Улаанбаатар хотод ногдож байна. Улсын хэмжээний цус өгөлтийг аваад үзвэл, өдөрт 180-250 цус цуглуулалт, нийслэлийн хэмжээнд 150-200 цус цуглуулалт хийж байж хэрэгцээгээ хангана.

УИХ-ын гишүүн Б.Пүрэвдорж:

-Эрхтэн, эд, эс шилжүүлэн суулгах үйл ажиллагаа олон жил хийгдсэн. Эрхтэн, эд, эс шилжүүлэн суулгах мэс заслын хүрээнд олон жил амьд явсан хүний зүгээс энэ хуулийг дэмжиж өгөөрэй гэж надаас хүссэн. Урьд нь хийж байсан мэс заслын тоо нэмэгдэх үү. Эрхтэн, эд, эс шилжүүлэн суулгах төв ямар байдлаар ажиллаж, хаанаас санхүүжих вэ?

Ажлын хэсэг:

-Дэлхийн эрүүл мэндийн практикт 1963 оноос амьгүй донороос эрхтэн, эд, эс шилжүүлэн суулгах үйл ажиллагааг эхлүүлсэн. Монгол Улс 2018 оноос амьгүй донороос эрхтэн, эд, эс шилжүүлэн суулгах мэс заслыг эрчимтэй хөгжүүлж байна. Амьгүй донорын оршуулгын тэтгэмж олгож эхэлбэл, шилжүүлэн суулгах үйл ажиллагаа олширно. Судалгаагаар БНСУ, БНТУ энэ тогтолцоо амжилттай хэрэгжсэн байдаг. Улсын нэгдүгээр төв эмнэлгийн хашаанд баригдаж буй Эрхтэн, эд, эс шилжүүлэн суулгах төвийг зохицуулах бодлогын байгууллага удирдана. Төсвийн санхүүжилтээр үйл ажиллагаа явуулах байх.

М.Ганхүлэг:

- Хэдэн төгрөгийн зардал гарах вэ. Хууль батлагдаад үр гарах байх?

Ажлын хэсэг:

-2018 оноос хойш 75 удаа эрхтэн, эд, эс шилжүүлэн суулгах мэс засал хийсэн. Амьгүй донорт оршуулгын тэтгэмж олгож эхэлснээр эрхтэн, эд, эс шилжүүлэн суулгах мэс заслын үйл ажиллагаа нэмэгдэнэ. Нийгмийн даатгалын үндэсний зөвлөлийн тогтоолоор 2023 онд амьгүй донорт оршуулгын тэтгэмж олгож эхэлснээр 2023 онд нэг, 2024 онд дөрөв, 2026 онд нэг хүн гээд нийт 22 сая төгрөгийн оршуулгын тэтгэмж олгосон. Мөн 2023 онд даатгуулагч биш байсан нэг хүнд оршуулгын тэтгэмж олгосон.  Цаашид жилд 10 амьгүй донор гарна гэж тооцоолон, хөдөлмөрийн хөлсны доод хэмжээг арав дахин нэмэгдүүлсэнтэй тэнцэх мөнгөн дүн буюу жилд ойролцоогоор 70 орчим сая төгрөгийн зардал гаргах тооцоо гаргасан гэлээ.

Эх сурвалж: “Зууны мэдээ” сонин

2026 ОНЫ ТАВДУГААР САРЫН 8. БААСАН ГАРАГ. № 88 (7830)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn