Т.САЙХАН

Ойрх Дорнодод үүсээд байгаа дайны нөхцөл байдлаас шалтгаалан авах арга хэмжээний талаар Эдийн засаг, хөгжлийн сайд Ж.Энхбаяр мэдээлэл өглөө.   Түүний байр суурийг хүргэе.

-Дэлхийн газрын тосны зах зээлд нийлүүлэлтийн том шок үүсэж эхэлж байна. Боловсруулах үйлдвэрүүд гэмтэл авсан. Дахин сэргэхэд 4-5 жил шаардлага үүсэж байна. Энэ бол бидний онцгой анхаарах асуудал. Дэлхий нийтээр нефтийн нийлүүлэлтийн шок үүссэн шатахууны хямрал багадаа дөрвөн сар үргэлжлэх төлөвтэй байна. Энэ нөхцөл байдал Монгол Улсын эдийн засагт сөрөг нөлөө үзүүлэх өндөр эрсдэлтэй байна. Ойрх Дорнод дахь мөргөлдөөн цаашид гүнзгийрвэл 2027 он хүртэл үргэлжлэх эдийн засгийн шок үүсч болзошгүй. Дэлхийн зах зээлд шатахууны бодит хомсдол үүсэж, үнийн огцом өсөлт бий болж байгаа нь Монгол Улсад инфляц нэмэгдэх, импортын үнэ өсөх, шатахуунтай холбоотой бараа бүтээгдэхүүний үнийн дарамт нэмэгдэх нөхцөлийг бүрдүүлж байна. Иймд үүсээд буй нөхцөл байдалтай холбоотойгоор Монгол Улсын эдийн засагт учирч болзошгүй хямралыг хохирол багатай даван туулах, онцгой үед шуурхай хариу арга хэмжээ авах зорилготой зөвлөл байгуулсан. Зөвлөлийн хуралдаанд Ерөнхий сайд Г.Занданшатар оролцож, үүрэг даалгавар өглөө.  Түүнчлэн олон улсын нөхцөл байдлаас үүдэлтэй эдийн засаг, нийгмийн хүндрэл үүссэн үед төсөв, санхүүгийн бодлогыг уян хатан хэрэгжүүлэх эрх зүйн орчныг бүрдүүлэх зорилгоор холбогдох хуулийн төслийг боловсруулж, УИХ-д яаралтай горимоор хэлэлцүүлэх нь зүйтэй гэж үзсэн. Ийнхүү дэлхийн зах зээлд үүсээд буй савлагаа Монгол Улсад шууд болон дам нөлөөгөөр нөлөөлөх нөхцөл бүрдэж байгаа энэ үед Засгийн газар эрсдэлийг бууруулах, эдийн засгийн тогтвортой байдлыг хадгалах чиглэлд шуурхай арга хэмжээ авч эхлээд байна. Ойрх Дорнодын бүс нутгийн нөлөө БНХАУ-ын эдийн засагт өндөр байгаа учраас тус улсаар дамжин Монголд нөлөөлөх өндөр магадлалтай. Шатахууны үнийн хувьд Монгол Улс ОХУ-тай шууд хамааралтай гэлээ.

Эх сурвалж: “Зууны мэдээ” сонин

2026 ОНЫ ГУРАВДУГААР САРЫН 25. ЛХАГВА ГАРАГ. № 56 (7798)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn