Т.САЙХАН

МАН-ын дарга, УИХ-ын дарга Н.Учрал Хятадын Коммунист намын урилгаар тус улсад айлчлал хийж байна. Айлчлалын бүрэлдэхүүн өчигдөр Бээжингийн робот үйлдвэрлэлийн паркийн үйл ажиллагааг үзэж сонирхжээ.  Бээжин нь дэлхийн роботын хэрэглээний тэргүүлэгч хот болох зорилтынхоо хүрээнд эдийн засаг, технологийн хөгжлийн бүсдээ олон улсад тэргүүлэх ухаалаг роботын үйлдвэрлэлийн загвар парк байгуулжээ.  Парк нь роботтой холбоотой бүх түвшний технологийн дэвшил, хэрэглээний орчинд зориулсан загвар, туршилтын чиглэлүүдийг төвлөрүүлж, роботын үйлдвэрлэлийн экосистемийг бүрдүүлж, чухал эд ангиуд болон үйлдвэрлэлийн гинжин холбоог бий болгосон байна.  Одоогоор тус паркт хүн хэлбэрийн робот, эмнэлгийн робот, тусгай зориулалтын робот, роботын эд анги зэрэг салбарын 100 гаруй компани төвлөрөөд байгаа аж. МАН-ын дарга Н.Учралыг дагалдан Хятадын Коммунист намын Төв хорооны ГХГ-ын дэд дарга Чэнь Жөү болон албаны бусад хүмүүс дагалдан ажиллав.

Гэр ахуйн хэрэглээ, асаргаа, цэвэрлэгээ, хүүхдийн тоглоомоос эхлээд эрүүл мэнд, эмнэлгийн салбар, хүнс, худалдаа үйлчилгээ, зар сурталчилгаа, спортын талбар, хүнд үйлдвэрт ч нарийн мэргэжлийн, эсхүл өндөр ачаалалтай ажил, үйлчилгээг хиймэл оюун, бүрэн тооцоололд үндэслэн зайнаас болон биечлэн, алдаа мадаггүй гүйцэтгэх боломжтой болсон талаар дэлгэрэнгүй мэдээлэл  өгч, загвар тус бүрийн талаар танилцууллаа.  Түүнчлэн хиймэл оюунд суурилсан, хэрэглэгчийн хүссэн дүр төрхтэй робот бүтээж байгаагаа танилцуулаад Альберт Эйнштейний төрхтэй роботыг сонирхуулав.

Тус парк дотоодын зах зээлд худалдаалах бүтээгдэхүүнүүдээ хятад хэлээр ашиглах горимтойгоор худалдаалдаг бол экспортын бүтээгдэхүүнүүддээ хятад болон англи хэлний горимоор ашиглах боломжтойгоор үйлдвэрлэдэг байна. Бээжингийн шинэ төрлийн үйлдвэрлэлийн хүчин чадлыг хөгжүүлэх жишиг бүс болох уг парк нь судалгаа, үйлдвэрлэл, үзүүлэн зэрэг олон чиглэлийг нэгтгээд “төв технологи+гол бүтээгдэхүүн+хэрэглээний орчин” гэсэн загвар дээр салбарын экосистемийг бүрдүүлэн, дэлхий дахинаа роботын технологийг хэрэглээнд нэвтрүүлэх жишиг болох зорилт дэвшүүлжээ. Хиймэл оюун ухаан, технологийн дэвшлийг нэгтгэсэн роботууд хятадуудын өдөр тутмын амьдралын нэг хэсэг болсон энэ цаг үед манай улс ч хиймэл оюун ухаан, инновац, мэдлэгийн шийдлүүдийг төр, хувийн хэвшил, бүх шатанд нэвтрүүлэх шаардлагатай талаар Монгол Ардын намын дарга, Монгол Улсын Их Хурлын дарга Н.Учрал тэмдэглэж байв. Тус паркийн Бээжингийн анхны роботын үзүүлэнгийн төвд дэлхийн анхны биежсэн ухаалаг роботын 4S дэлгүүр болох “Роботын ертөнц”, Хятадын анхны роботын сэдэвтэй орчин үеийн ресторан болох “Роботын гал зуух”, Үндэсний роботын шалгалт, үнэлгээний төв, роботын үйлдвэрлэлийн инкубатор, роботын хоёрдогч хөгжүүлэгчдийн нийгэмлэг зэрэг нийслэл болон улсын хэмжээний аж үйлдвэрийн инновацын платформууд нэгдсэн байна. Ингэснээр Бээжингийн аж үйлдвэрийн хөгжлийг дэмжих гол төв болжээ. Улмаар парк нь Бээжингийн роботын үйлдвэрлэлийн хүчийг олон улсад танилцуулах чухал цонх болж, биежсэн ухаалаг технологийн судалгаа, хөгжүүлэлтээс хэрэглээнд нэвтрүүлэх бүх процессыг үзүүлж, олон улсын хамтын ажиллагаа, технологи солилцоог дэмжих үр дүнтэй индэр болсон байна. МАН-ын дарга, УИХ-ын даргын айлчлалын бүрэлдэхүүнд  Бүгд Найрамдах Хятад Ард Улсад айлчлалын бүрэлдэхүүнд намын Удирдах зөвлөлийн гишүүд багтан ажиллаж байна.

Эх сурвалж: “Зууны мэдээ” сонин

2026 ОНЫ ГУРАВДУГААР САРЫН 24. МЯГМАР ГАРАГ. № 55 (7797)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn