Ч.БЯМБАХАЖИД

Ерөнхийлөгч У.Хүрэлсүх 21 улсад суух Элчин сайдын нэрийг УИХ-д өргөн барьж, намрын чуулганы төгсгөлд хэлэлцэн томилсон. 2021 оны долоодугаар сард 23 Элчин сайдыг томилж байсан бөгөөд дөрвөн жилийн хугацаа нь дуусгавар болж дараагийн хүмүүсийг томилсон нь энэ юм. “Хэн нь хэн бэ” буландаа Оросын холбооны улсад суух Онц бөгөөд Бүрэн эрхт Элчин сайдаар томилогдсон Д.Давааг онцолж байна.

Ерөнхийлөгч У.Хүрэлсүх Монгол Улсаас Оросын Холбооны Улсад суух Онц бөгөөд Бүрэн эрхт Элчин сайд Дуламсүрэнгийн Даваад Итгэмжлэх жуух бичгийг өнгөрсөн бямба гарагт гардууллаа.

Элчин сайд ёс зүйтэй, сахилга, хариуцлагатай байж, үндэсний язгуур эрх ашгийг ямагт дээдлэх, суугаа болон тухайн бүс нутгийн орнуудтай харилцаа, хамтын ажиллагааг гүнзгийрүүлэн хөгжүүлэх, хөрөнгө оруулалт татах, эх хэл, түүх, соёл, зан заншил, уламжлалаа өвлүүлэх, түгээн дэлгэрүүлэх, эх орноо сурталчлан таниулах зэрэгт анхаарч ажиллахыг үүрэг болголоо.

Мөн монгол иргэдийнхээ хууль ёсны эрх ашгийг хамгаалж, боломжит бүх хэлбэрээр дэмжиж байхыг онцгойлон захижээ.

Дуламсүрэнгийн Даваа нь 1963 оны арванхоёрдугаар сарын 29-нд Сэлэнгэ аймагт төрсөн. Боловсролын хувьд 1981 онд Сэлэнгэ аймгийн сургалтын төвд цэргийн сургалтад хамрагдсан. 1986 онд ЗХУ-ын Вольск хотын Цэргийн ар талын дээд сургуулийг төгссөн. 1994 онд ОХУ-ын Санкт-Петербург хотын Цэргийн зам харилцааны дээд сургуулийг төгсжээ. 1997 онд ОХУ-ын Санкт-Петербург хотын Цэргийн ар тал, тээврийн академийг стратегийн мэргэжлээр магистрын зэрэг хамгаалжээ. Орос, англи хэлний мэдлэгтэй.

Тэрээр төрийн албанд 33 жил ажилласны сүүлийн гурван жилийн хугацаанд дипломат албанд ажилласан байна.

Өмнө нь Монгол Улсаас Оросын Холбооны Улсад суух Онц бөгөөд Бүрэн эрхт Элчин сайдаар 2019 оны арваннэгдүгээр сарын 29-ний өдөр томилогдож байжээ.

Д.Даваа нь дэслэгч генерал цолтой бөгөөд 2015 оноос ЗХЖШ-ын даргаар, 2018-2019 онд Монгол Улсын Ерөнхийлөгч асан Х.Баттулгын батлан хамгаалах бодлого, аюулгүй байдлын асуудал хариуцсан зөвлөх, 2019-2021 онд Монгол Улсаас ОХУ-д суух Онц бөгөөд Бүрэн эрхт Элчин сайд, 2022 оноос "Эрдэнэс газ" ХХК-ийн төслийн нэгжийн удирдагчаар ажилласан байна.

Өмнө нь 2020 оны хоёрдугаар сарын 5-нд ОХУ-ын Ерөнхийлөгч Владимир Путинд Итгэмжлэх жуух бичгээ барьсан байна. 2021 онд хоёр улсын иж бүрэн стратегийн түншлэлийг хөгжүүлэхэд оруулсан хувь нэмрийг нь үнэлж ОХУ-ын төрийн дээд шагнал "Найрамдал" одонгоор шагнажээ.

2025 оны арванхоёрдугаар сарын байдлаар түүнийг Элчин сайдын албан тушаалаас нь эгүүлэн татаж, оронд нь өөр хүнийг томилох асуудал яригдаж эхэлсэн байна. Тэрээр Элчин сайдаар ажиллаж байх хугацаандаа ОХУ-аас БНХАУ-д нийлүүлэх хийн хоолойг Монгол Улсын нутаг дэвсгэрээр дамжуулах төслийн бэлтгэл ажилд идэвхтэй оролцсон юм.

Эх сурвалж: “Зууны мэдээ” сонин

2026 ОНЫ ГУРАВДУГААР САРЫН 3. МЯГМАР ГАРАГ. № 39 (7781)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn