Б.НЯМСҮРЭН

Ойрын өдрүүдэд олон нийтэд ихээхэн, тэр дундаа үг хэлэх үзэл бодлоо илэрхийлэх үндсэн эрхүүдийг хангах эсэхийг шийдэх хоёр ч томоохон хуулийн төслийг УИХ-ын чуулганаар хэлэлцэхээр яригдаж байна. Энэхүү хоёр хуулийн нэг нь Жагсаал цуглаан хийх журмын тухай хуулийн шинэчилсэн найруулгын төсөл, нөгөө нь Хэвлэл мэдээллийн эрх чөлөөний тухай хууль юм.

“Зууны мэдээ” сонины хувьд хоёр долоо хоног тутамд нийтийн эрх ашгийг хөндсөн эрэн сурвалжлах бүтээлийг тогтмол бэлтгэн уншигчдадаа хүргэх болсон. Өнгөрсөн сард нийтийн эрх ашгийг хамгаалах нийтлэлийн хүрээнд “Жагсаал цуглааны тухай хууль жагсагчдыг хамгаалж чадаж байна уу” нэртэйгээр нийтлэлийг уншигчдадаа хүргэсэн. Ардчилсан нийгэмд аливаа улсын иргэд эвлэлдэн нэгдэх, үзэл бодлоо илэрхийлэх эрх нээлттэй байдгаараа бусад дарангуйллын дэглэмүүдээс ялгаатай. Манай улсын хувьд ч ардчилсан улс орнуудын жишгээр жагсаал цуглааны тоо сүүлийн жилүүдэд эрс нэмэгдсэн. Хүний эрхийн үндэсний комиссын тайлангаас харахад 2020-2023 онд Монголд нийт 736 удаагийн жагсаал, цуглаан зохион байгуулагдсаны 649 нь нийслэл Улаанбаатар хотод, 87 нь орон нутагт зохион байгуулагджээ. Дөрвөн жилийн хугацаанд 736 гэдэг тооны хувьд олон болж, энэ нь жагсч цуглах эрхээ эдэлж чадаж байгаа мэт боловч нөгөө талаар жилээс жил жагсаал цуглаан хийх эрх эсрэгээрээ хумигдсаар байгааг энэ хуульд гар хүрч буй нөхцөл байдлаас дүгнэж болно. Тодруулбал, Монгол Улс Жагсаал цуглаан хийх журмын тухай хуулийг 1994 онд баталж түүнээс хойш 30 жилийн хугацаанд нийт долоон удаагийн нэмэлт, өөрчлөлт оруулжээ. Гэвч дээрх нэмэлт, өөрчлөлтүүд бүгдээрээ үзэл бодлоо илэрхийлэх, жагсах, цуглах эрхийг хязгаарлах чиглэлээр, албадан тараах үйл ажиллагаанд хүч нэмэгдүүлсэн агуулгаар шинэчлэгдэж ирсэн байна. Аливаа зүйл шинэчлэгдэн өөрчлөгдөх нь сайн тал руугаа байх ёстой боловч энэ хуулийн хувьд эсрэгээрээ, улам хуулийн нөхцөл байдал иргэдэд халтай болон өөрчлөгдсөн байна.

Үргэлжлэлийг zuuniimedee.mn сайтаас цахим сонин захиалан уншаарай.

Эх сурвалж: “Зууны мэдээ” сонин

2025 ОНЫ ТАВДУГААР САРЫН 1. ПҮРЭВ ГАРАГ. № 81 (7578)