Ө.НАМУУН

Зуны адаг сар алгуурхан алсарч буй энэ үед зарим нь хүүхдийнхээ хичээлийн шинэ жилийн бэлтгэлийг базаагаад эхэлжээ. “Бөмбөгөр” худалдааны төв амралтын өдөр болоод ч тэр үү хөл хөдөлгөөнтэй байлаа. Бичиг хэргийн тасагт супер баатрын зурагтай цүнх рүү заан ээжийгээ шаналгах хүүхдээс эхлээд ахлах ангийн сурагчид, оюутнууд үйлчлүүлж байгаа харагдана. Энэ үеэр зарим худалдан авагчтай хэдэн үг сольж амжив. Чингэлтэй дүүргийн VII хорооны иргэн В.Оюунтуяа “Гэртээ хүнс цуглуулах зуураа хүүгийнхээ дэвтэр, үзгийг авах санаатай харж явна. Жил бүр үнэ нь нэмэгдэх юм. Охиныгоо бага ангид байхад 100 төгрөгөөр авдаг байсан дэвтэр одоо 150 төгрөг болсон байна шүү дээ” гэв. Харин худалдагч нарын ярьж буйгаар барааны үнэ төдийлөн нэмэгдээгүй аж. Үнийн хувьд:

“Оргил” төв долдугаар сарын 26-наас есдүгээр сарын 10 хүртэл “Бичгийн хэрэгслийн үзэсгэлэн худалдаа” зарлажээ. Бичиг хэргийн тасагт ормогц нимгэн, зузаан дэвтэр, үзэг бал, өнгийн харандаа гээд төрөл бүрийн бараа өрөөстэй. Худалдан авагч А.Мөнхсанаа “Өнгөрсөн жил хүүхдийнхээ хичээлийн хэрэгслийг эндээс бэлдсэн. Бусад газартай харьцуулахад хямд үнэтэй, өргөн сонголттой” гэв. Харин худалдагч Т.Билгүүнзаяа “Үнийн хувьд 5-10 төгрөгөөр нэмэгдсэн байна. Дэвтэр, үзэг зэрэг барааг боодлоор нь авахад багцын үнээр тооцогдоно. Ер нь жил бүр бид үйлчлүүлэгчиддээ хамгийн хямд үнээр худалдан авах боломжийг олгохын тулд үзэсгэлэн худалдаа зохион байгуулдаг” гэв. Оргил төвд зарж буй хичээлийн хэрэгслийн үнийг сонирхуулбал:

“Нарантуул” олон улсын худалдааны төв  хямд үнэ, өргөн сонголттой тул хот, хөдөөнийхөн хамгийн түрүүнд зорьж очдог. Бэлтгэлийн хувцас дунджаар 45 мянган төгрөг, хүүхдийн бэлтгэлийн хувцас 35 мянган төгрөг, эрэгтэй сорочкан цамцны үнэ доод тал нь 18 мянган төгрөг, эрэгтэй эмэгтэй өмд 16 мянган төгрөг, гутал 20 мянган төгрөгөөс эхэлж байлаа.

Харин хичээлийн хэрэгслийн хувьд дэвтэр 180-1500 төгрөг, үзэгний үнэ 300 төгрөгөөс эхэлж байв. “Оргил”, “Бөмбөгөр”, “Нарантуул”-д одоохондоо хамгийн эрэлттэй байгаа хичээлийн хэрэгслийн үнийг тоймлон хүргэлээ. Худалдагч нар 5-10 төгрөгөөр нэмэгдсэн гэж тайлбарлаж байгаа хэдий ч худалдан авагчид 50-100 төгрөгөөр өссөн гэж гомдоллож байна.

Эх сурвалж: "Зууны мэдээ" сонин