Монголбанкны Мөнгөний бодлогын зөвлөл өчигдөр хуралдаж бодлогын хүүг 12 хувь болгох шийдвэр гаргалаа. Валютын ханшийн болоод инфляцийн өсөлтийг хатуу бодлогоор зохицуулах хэрэгтэйг судлаач, эдийн засагчид хэлдэг.  Статистикаас харахад 2012 оны дөрөвдүгээр сард 13.25 хувьтай байсан мөнгөний бодлогын хүү 10.5 хувь болтлоо буурсан.

Эдийн засаг нь хүндэрч, инфляцийн 30 хувьд хүмүүсийн хэтэвчин дэх хэд нь үнэгүйдсэн ч “Ажлын байрыг аврах нь чухал” гэх итгэл үнэмшил дүүрэн байсан Төвбанкныхан нэлээд тэссэний эцэст ийн шийджээ.

Өнгөрсөн сарын эцэст улсын хэмжээнд инфляц 14.6 хувь, нийслэлийн хэмжээнд 15.1 хувьд хүрчээ. Монголбанкны Ерөнхийлөгч Н.Золжаргал “Гадаадын шууд хөрөнгө оруулалт, гадаад цэвэр актив буурсан хандлага сүүлийн хоёр жил үргэлжилж байна. Гэтэл төсөвтэй адилтгах хөрөнгө оруулалтын зарцуулалтууд буураагүй. Түүнчлэн гадаад валютын орох урсгал, төлбөрийн тэнцлийг сайжруулах арга хэмжээний үр дүн хангалттай биш” гэв.

Мөнгөний бодлогын зөвлөлийн гишүүд бодлогын хүүг 2.5 нэгжээр нэмэх санал гаргасан байна. Гэвч эдийн засгийн тэлэлтийг хэт хумигдахаас зайлсхийж 1.5 нэгжээр нэмжээ. Бодлогын хүүгийн энэхүү өөрчлөлт манай эдийн засагт нэгээс зургаан сарын хугацаанд эерэг нөлөөллөө үзүүлнэ гэдгийг албаныхан хэллээ. 

Монгол Улсын валютын албан нөөц тавдугаар сарын байдлаар 1.6 тэрбум ам.доллар буюу өнгөрсөн жилийн мөн үетэй харьцуулахад 52.6 хувиар буураад байгаа аж. Төлбөрийн тэнцлийн хүндрэлийг зөөлрүүлэх, инфляцийг эрчимжүүлэхгүйн тулд ийнхүү хүүгээ нэмсэн гэдгийг албаныхан хэллээ. Энэ нь иргэдийн бодит орлогыг хамгаалах зорилгоор төгрөгийн өгөөжийг нэмэгдүүлсэн арга хэмжээ болно гэдгийг ч мөн онцлов. Н.Золжаргал “Бодлогын хүүг өсгөснөөр зээл хумигдах эрсдэлтэй. Гэхдээ хэрэглээний зээлд илүү нөлөөлнө гэсэн хүлээлттэй байна. Эндээс гарах үр дүн өнөөдрөөс эхлэн валютын захад нөлөөлж эхэлнэ. Аж ахуйн нэгж, иргэдийн тухайд 3-6 сарын дараагаас нөлөөлж эхэлдэг” гэв.

Мөнгөний бодлогын хүүг өсгөснөөр инфляцийн өсөлтийг 12 хувьд барих боломж бүрдэж байгааг зөвлөлийн гишүүд хэлсэн юм. Мөн Төвбанкны зүгээс ипотекийн найман хувийн хүүтэй зээлийг зогсолтгүй үргэлжлэнэ гэдгийг албан ёсоор мэдэгдэв. Арилжааны банк найман хувийн зээл олгохгүй, эх үүсвэргүй байгаа гэсэн нь ор үндэсгүй гэдгийг Монголбанкны ерөнхийлөгч хэллээ. Ипотекийн зээл нийт зээлд эзлэх жин өндөр байгаад хүмүүс шүүмжлэлтэй ханддаг. Гэхдээ энэ нь бусад зээлтэй харьцуулахад найдвартайд тооцогддог аж. Эдийн засгийн хүндрэлийн үед найдвартай зээл гаргаж байгаа нь зөв хэмээн мэргэжилтнүүд хэлэв.  гэж харж байгаагаа тэрээр хэлсэн юм.

Гадаад зах зээлээс хөрөнгө оруулалт татах шаардлагатай байгаа тул гадны томоохон банкны салбарыг Монголд нээх асуудал яригдаж байгаа. Тэр дундаа Хятадын банк төрийн өмчит банк болох “Bank of China” Монголд салбараа нээх асуудлаар “Bank of China -ийн зүгээс манай улсад албан ёсоор хандсан зүйлгүй. Монгол Улсад Японы хоёр банкны салбар бий. Тиймээс бид хүсэлт, санал орж ирвэл энэ асуудлыг авч хэлэлцэнэ” хэмээн ноён Н.Золжаргал хэлсэн юм.

Бодлогын хүүг нэмж буй нь ажлын байр болоод эдийн засгийг хэт хумисан 2009 оны хямралтай харьцуулахад эдийн засагт үзүүлэх сөрөг нөлөөлөл бага хэмээн Монголбанкныхан үзэж буй аж.

Нэг ам.доллар 1400-аас 1800 болсон нь бодит үнэн. Гэвч ажлын байрыг алдахгүй байх, эдийн засгийг сөрөг төвшинд хүргэхгүйн төлөө ажилласан гэдгээ тэд хэлэв. Валютын ханшид шууд нөлөөлөхөөс илүү төлбөрийн тэнцэлээр дамжуулах нь эдийн засагт урт хугацаандаа үр дүнгээ өгдөг ажээ.