Ц.БАЯР

Тогтвортой хөгжил бизнесийн ертөнцөд  чухал асуудал болж байна. Хүрээлэн буй орчинд сөрөг нөлөө үзүүлдэггүй бизнесийн үйл ажиллагаа өсөн дэвжих боломж үргэлж урд нь байсаар байдаг аж. Бизнесээ илүү тогтвортой ногоон болгоход эхэндээ хэцүү мэт санагдах боловч ийм сорилтыг даван туулахын үнэ цэн өгөөж нь өндөр байдаг. Амжилттай энтрепренер, эзэд манлайлагчид нь асуудлыг боломж болгон хардаг. Мөн ажилтнууд ч компаниа “ногоон” болгоход ихээхэн хувь нэмэр оруулна.  Бизнесүүдийн хувьд үл ажиглагдам боловч өдөр тутамдаа хэрэглэж болох өөрчлөлтүүд нь органик хүнс, сэргээгдэх эрчим хүчний бүтээгдэхүүн, ухаалаг барилга, томоохон инновац, бүтээн байгуулалтуудтай дүйцэх хөрөнгийг авчирах боломжтой юм.

Монгол Улсын газар нутагтай тэнцэх хэмжээний хогон арал Номхон далайд хөвж байгаа тухай бичиж байна. Хэрэв хуванцар бүтээгдэхүүнийг ихээр үйлдвэрлэдэг мөн ашигладаг компаниуд үгүйсэн бол ийм арал үүсэхгүй. Бөөнөөр үйлдвэрлэх бүтээгдэхүүний эрэлтийг нэмэгдүүлэн ашгийн хэмжээг аль болох ихэсгэхийг чухалчлах болсон өнөөгийн бизнес загварын улмаас 2050 он гэхэд хүн төрөлхтөн 27 тэрбум хатуу хог хаягдал үйлдвэрлэх ажээ. Түүнчлэн нүүрстөрөгчийн давхар ислийн ялгарлыг хянахад анхаарал хандуулахгүй бол 2050 он гэхэд дэлхийн агаар хоёр хэмээр дулаарч  далай тэнгисийн түвшин нэмэгдэх, цаг уурын аюулт үзэгдэл улам ихсэх эрсдэлтэй гэж “Environmental Sustain- ability” сэтгүүлд онцолжээ. Мөн 100 компани нийт ялгаруулалтын 71 хувийг эзэлж байгаа аж. Тиймээс бизнесүүд асуудлын  бус шийдлийн нэг хэсэг болох цаг иржээ.

Дэлхий даяар автомашинтай хүмүүс өдөр бүр 2.9 тэрбум литр бензинийг түгжрэлд үр ашиггүй шатааж, нэг хүний бүтээмж жилд 710 ам.долларын алдагдал хүлээдэг тооцоо бий. Тэгвэл хүн бүр ногоон хөгжилд хувь нэмэр оруулах нь чухал юм. Ингэхдээ хогоо ангилан ялгадаг, дугуйгааар ажилдаа ирж, очдог хэвшлийг бий болгоход л хангалттай. Компаниуд бизнесээ ногоон болгох алхмыг эхлүүлэх нь чухал.

Эх сурвалж: “Зууны мэдээ” сонин

2022 ОНЫ ДӨРӨВДҮГЭЭР САРЫН 22. БААСАН ГАРАГ. № 81 (6813)