Б.БЯМБАЖАРГАЛ

Асгатын мөнгөний ордыг эдийн засгийн эргэлтэд оруулах шийдвэрийг Монгол Улсын Засгийн газраас гаргалаа. Тодруулбал, Монгол Улсын Ерөнхий сайд Л.Оюун-Эрдэнэ “Шинэ сэргэлтийн бодлого”-ыг Баян-Өлгий аймагт танилцуулах үеэр Өлгийчүүд Асгатын мөнгөний ордыг эдийн засгийн эргэлтэд оруулахыг дэмжиж тус шийдвэрийг гаргалаа.

Мөн Баян-Өлгий аймгийг аялал жуулчлалын дөрөв дэх бүс болгон хөгжүүлж Алтай-Таванбогд чиглэлийн авто зам барихаар болов. Түүнчлэн Боомтын сэргэлтийн хүрээнд Цагааннуур, Даянгийн боомтыг авто замаар холбох болон агаарын замыг шинэчлэх асуудлыг ЗТХ-ын сайд Л.Халтарт даалгав. Эдгээрт шаардлагатай төсөв, хөрөнгийг 2023 оны төсөвт тусгахаар боллоо.

Энэ талаар Ерөнхий сайд Л.Оюун-Эрдэнэ “Асгатын мөнгөний ордыг ашиглалтад оруулснаар хүртэх үр өгөөж 500 сая ам.доллар гэсэн тооцоолол гарсан. Асгатын ордыг ашиглалтад оруулснаар Баян-Өлгий аймгийн ДНБ, ажлын байр нэмэгдэх зэргээр орон нутагт хүртэх өгөөж асар их” гэв.

Асгатын мөнгөний орд нь Баян-Өлгий аймгийн Ногооннуур суманд Өлгий хотоос баруун тийш 180 км, Цагаан нуурын чөлөөт бүсээс хойш 40 орчим км, Улаанбаатар хотоос баруун тийш 1800 км зайд оршдог. Асгатын мөнгөний орд нь нийт 6.4 сая тонн хүдэр, 72.6 мянган тонн зэс, 3.3 мянган тонн висмут, 31.8 мянган тонн сурьма, 2.2 мянган тонн мөнгөнөөс гадна бусад дагалдах холимог металлын нөөцтэй сиратегийн чухал орд юм.

Эх сурвалж: www.polit.mn