С.САРУУЛ

"Капитал банк" ХХК дахь банкны эрх хүлээн авагчийн өнгөрсөн гурван жилийн хугацаанд хийж хэрэгжүүлсэн ажлын талаар албаны хүмүүс мэдээлэл өглөө. Банкны эрх хүлээн авагч Т.Дэлгэрхүү "Банкийг татан буулгахад үндсэн гурван ажил бий. Зээл авлага төлүүлэх, банкны хөрөнгийг дуудлага худалдаагаар борлуулах, үүнээс олсон орлогоор өр төлбөр барагдуулна.  Капитал банкийг татан буулгахад банкан дахь мөнгөн хадгаламжийн даатгалын тухай хуулийг амжилттай хэрэгжүүлсэн. Ингээд 20 сая хүртэлх төгрөгийн барагдуулалтын хувьд 352,135 харилцагчид 44.5 тэрбум төгрөгийг барагдуулсан. Даатгагдаагүй буюу бусад хадгаламж эзэмшигчдийн хохирлыг барагдуулсан.

Өнөөдрийн байдлаар 353,134 давхардсан тооны харилцагчийн 238.8 тэрбум төгрөгийн өр төлбөр, иргэн хуулийн этгээдийн харилцах хадгаламжийн 99.9 хувийнх нь хохирлыг бүрэн барагдуулсан. Уг банканд эрх хүлээн авагч томилогдон очиход 203.1 тэрбум хөрөнгийг бүртгэлийн дүнтэй байсан. Тус банкны хөрөнгийн үнэлгээг хөндлөнгийн байгууллагаар хоёр удаа шалгуулсан. Гуравдугаар сарын 21-нд нээлттэй дуудлага худалдаа зарласан. Ингээд сар тутамд дуудлага худалдаа хийгээд хөрөнгөө борлуулна. Хөрөнгө шилжүүлж авах хүсэлт төрийн байгууллагаас орж ирвэл гэрээ хийнэ. Капитал банк төлбөрийн чадваргүйн улмаас татан буугдсан. Мөнгөгүй газар хэдэн тэрбумаар нь гомдол барагдуулж чадахгүй. Бид эрүүгийн цагдаад 100 гаруй тэрбум төгрөгийн гомдол гаргасан. Банкны тухай хуульд банкны эрх хүлээн авагч тухайн газарт очоод хууль бус зүйл илрүүлбэл Монголбанканд мэдэгдээд хуулийн байгууллагад шалгуулна гэж заасан байдаг. Уг шалгуулж байгаа асуудлууд өмнөх удирдлагуудтай холбоотойгоор шийдэгдээгүй байгаа" гэлээ.

Эх сурвалж: www.polit.mn