Ц.БАЯР 

“Зууны мэдээ” сонин, “Голомт Капитал” үнэт цаасны компанитай хамтран Хөрөнгийн болон Уул уурхайн зах зээлд дээрх сонирхолтой мэдээллүүдийг цувралаар хүргэдэг билээ. Энэ удаад өнгөрсөн долоо хоногийн таваарын зах зээлийн мэдээллийг онцолж байна.

Оны эхний улиралд ДНБ 15.7 хувиар өсчээ
     
Монголбанкны тооцооллоор дотоодын нийт бүтээгдэхүүн I улиралд 7-8 хувийн өсөлттэй гарахаар байгааг өмнө нь мэдээлсэн. Тэгвэл  Үндэсний статистикийн хороо ДНБ-ий 2021 оны I улирлын гүйцэтгэлийг танилцуулахдаа энэ оны гүйцэтгэлийг  2020 оны мөн үетэй харьцуулахад бодит ДНБ 15.7 хувиар өссөн бөгөөд энэ нь  уул уурхай, олборлолтын салбарын орлогын өсөлт голлох нөлөөг үзүүлсэн гэлээ. Өсөлтийг бүтцээр нь харвал уул уурхай, олборлолтын салбараас 0.7 хувь нь 5.7 хувь нь бүтээгдэхүүний цэвэр татвараас, харин 1.8 хувь нь үйлчилгээний салбараас 1.6 хувь нь аж үйлдвэр, барилгын салбараас нөлөөлөл үзүүлжээ. 
Уул уурхай, олборлолтын салбарын нэмэгдэл өртөг оны эхний улиралд 34.1 хувиар өссөн байна. Энэ өсөлтөд нүүрс олборлолт 53 хувиар өссөн түмрийн хүдэр, баяжмал олборлолт 39.5 хувь,  газрын тос олборлолт гурав дахин их, зэсийн баяжмал 11.3 хувиар өссөн нь голлон нөлөөлжээ.
Олон улсын таваарын зах зээлд түүхий эдүүдийн үнэ өндөр байгаа нь экспортод эерэгээр нөлөөлж эдийн засгийн өсөлтийг дэмжээд байгаа юм. 
Эдийн засаг 2021 онд 6.1 хувиар өснө гэж Монголбанк тооцоолж байгаа бол Олон улсын валютын сангийн IV сарын шинэчилсэн төсөөллөөр эдийн засаг энэ онд таван хувиар өсөхөөр байна. Түүнчлэн Азийн хөгжлийн банк төсөөллөө бууруулж, 4.8 хувиар өснө гэсэн тооцооллыг гаргаад байгаа юм.

Эх сурвалж: www.polit.mn