Д.ОЮУНЧИМЭГ

Эдийн засгийг эрчимжүүлэх төлөвлөгөө батлагдаад 30 хоног өнгөрчээ. Энэ талаар “Саус гоби сэндс” компанийн гүйцэтгэх захирал С.Энх-Амгалан байр сууриа илэрхийллээ.

-Эдийн засгийг 100 хоногт эрчимжүүлэх хөтөлбөрийг хүмүүс янз бүрээр тайлбарлаж байгаа. Та үүнийг хэрхэн харж байна вэ?

-Аливаа зүйлийг хийхийн өмнө хэдэн хэсэгт хувааж болно. Тухайлбал, богино хугацаанд болон тодорхой хугацаанд хийх ажлыг хуваарилж болно. Алсыг харж хийх ч ажил бий. Эдгээрийн үр дүн урт хугацаанд гардаг. Энэ ажлын хүрээнд богино хугацаанд хийж гүйцэтгэх ажлыг тодорхойлж, хийх хэрэгтэй. Мөн урт хугацаанд эерэг дүн авчрах ажлыг эхлүүлэх ёстой гэж ойлгож байна.

-Иргэдийн хувьд 100 хоногийн дараа өргөс авсан мэт эрүүлжсэн эдийн засагтай болно гэсэн хүлээлт байгаа шүү дээ?

-Миний хувьд 100 хоногт өргөс авсан мэт болж чадахгүй. Харин энэ хугацаанд өөрчилж болох зүйлийг хийхээс гадна урт хугацаанд эерэг үр дүн авчрах ажлыг яаралтай эхлүүлэх хэрэгтэй юм.

-Тухайлбал юу хийх хэрэгтэй вэ?

-Манай улсын хувьд хэд, хэдэн зүйлийг хийж болно. Тухайлбал, гадаадын хөрөнгө оруулалт, валютын урсгалыг нэмэгдүүлэх. Тиймээс гадаадын хөрөнгө оруулагчдын итгэлийг сэргээх ажлыг энэ хугацаанд хийх ёстой. Үүний тулд хийх ажлаа зөв тодорхойлж, томъёолох хэрэгтэй. Тодруулбал, 100 хоногт эдийн засагт эергээр нөлөөлөх ажлуудыг эхлүүлэх, хийж гүйцэтгэх боломжтой. Эдгээр өдрүүд нь бизнес эрхлэгчдийн хувьд маш чухал өдрүүд юм.