Б.НАМУУН Энэ оны хоёрдугаар сарын Нийгэм, эдийн засгийн салбарын статистик үзүүлэлтийг өнөөдөр Үндэсний статистикийн хорооноос танилцуулсан. Нийгмийн даатгалын ерөнхий газрын нийгмийн даатгалын шимтгэл төлөлтийн тайланд 2019 оны дөрөвдүгээр улирлын байдлаар нийт 42 мянган ААНБ-ын 679.8 мянган ажилчин хамрагджээ. Тодруулбал, нийгмийн даатгалын шимтгэл төлж буй ААНБ-ын тоо өмнөх оны мөн үеэс 1.5 мянгаар, өмнөх улирлаас 141-ээр буюу 0.3%-аар тус тус өссөн аж. Харин ажил эрхлэгчийн тоо өмнөх оны мөн үеэс 27.5  мянгаар өсөж, өмнөх улирлаас 5.6 мянгаар буюу 0.8 хувиар буурчээ. Түүнчлэн Нийгмийн даатгалын ерөнхий газрын нийгмийн даатгалын шимтгэл төлөлтийн 2019 оны дөрөвдүгээр улирлын тайланд хамрагдсан 679.8 мянган ажиллагчдын медиан цалин 905 мянган төгрөг болсон байна.  Харин нэг ажилтанд ногдох сарын дундаж цалин өнгөрсөн оны дөрөвдүгээр улирлын байдлаар улсын хэмжээнд 1.2 сая төгрөг болж, өмнөх оны мөн үеэс 122.4 мянган төгрөгөөр, өмнөх улирлаас 76.3 мянган төгрөгөөр нэмэгджээ. Ажиллагчдын сарын дундаж цалинг бүсээр авч үзвэл, баруун бүсэд 838.9 мянган төгрөг,зүүн бүсэд 951.2 мянган төгрөг, хангайн бүс болон төвийн бүсэд 1.1 сая төгрөг байгаа нь улсын дунджаас 145.6-403.8 мянган төгрөгөөр бага байгаа аж. Харин Улаанбаатар хотод ажил эрхлэгчдийн сарын дундаж цалин өнгөрсөн оны дөрөвдүгээр улирлын байдлаар 1.4 сая төгрөг байгаа нь улсын дунджаас 123.2 мянган төгрөгөөр их байна. Эх сурвалж: www.polit.mn