М.ЦЭЦЭГ

Засгийн эрх өөр намд шилжсэн үеэс яам, агентлагийн дарга нар бүгд өөрчлөгдсөн. Хаа нэгтээ мэр сэр хуучин хүн үзэгдэх нь бий. Тодруулбал, Газрын тосны газрын дарга Г.Өлзийбүрэнг нэрлэж болно. Түүнийг МАН-ын гишүүн гэж эртнээс  л ярьдаг, бичдэг байлаа. Учир нь АН-ын гишүүн С.Одонтуяагийн нөхөр учир Г.Өлзийбүрэнгийн ажил, амьдралын намтар олны өмнө ил байсан хэрэг.

МАН-ыг нэрээ солиогүй байх үеийн гишүүн нь тэр мөн. Г.Өлзийбүрэн Сүхбаатар дүүргийн Иргэдийн хурал болон Нийслэлийн ИТХ-ын төлөөлөгчөөр сонгогдож байжээ. Хожим нь буюу засаг төр солигдохын өмнөхөн Газрын тосны газрын дэд даргаар томилогдож, Шинэчлэлийн Засгийн газрын томилгоогоор газрын дарга болон дэвшсэн түүхтэй.

Хэдийгээр МАН-ын гишүүн ч гэлээ одоогийн Засгийн газрын бүтцэд багтаж томоохон агентлагийн дарга болсон түүхийг түүний нөхөр УИХ-ын гишүүн С.Одонтуяатай холбож ойлгох нь бий. Угаас гэр бүлийн хүн нь төрийн түшээ болсон учир дэмжлэг ч байсан л биз.

Г.Өлзийбүрэн “Улаанбаатар төмөр зам” төрийн  өмчит компанийн Хангамжийн албаны даргаар ажиллаж байсан. Нэг хэсэг түүнийг “Монголын төмөр зам” төрийн өмчит хувьцаат компанийн захирал болох гэж байгаа тухай хэвлэлээр мэдээлдэг байв.

Г.Өлзийбүрэн ОХУ-ын Ленинград хотын их сургуулийг төгссөн, эдийн засагч, эрх зүйч мэргэжилтэй юм байна. Түүний гэр бүл “Сентоза” нэртэй хувийн компанитай.

Цагаан сарын өмнөхөн УИХ-ын чуулганаар Газрын тосны тухай хуулийн шинэчилсэн найруулгын төслийг хэлэлцэн баталсан. Тодруулбал, Г.Өлзийбүрэн даргын удирддаг газрын дагаж мөрдөх гол хууль юм. Уг хуулиас газрын тостой холбоотой үйл ажиллагааны 33-аас доошгүй хувийг үндэсний аж ахуйн нэгжээр гүйцэтгүүлэхээр заасныг хассан юм.Газрын тосны газрын дарга Г.Өлзийбүрэнгийн тайлбарласнаар, газрын тосны салбарт ажиллах өрөмдлөгийн монгол инженер цөөн байдаг аж. Тиймээс ийм ажлын 33 хувийг Монголын аж ахуйн нэгжээр гүйцэтгүүлнэ гэсэн заалт амьдрал дээр биелэхгүй гэж эрхэм гишүүдэд ухуулж байлаа.

Ийм ажил, амьдралын товч бөгөөд тодорхой намтартай Газрын тосны газрын даргыг “Хэн нь хэн бэ” буланд онцлов.