Б.ДАМДИН

Газрын харилцаа, геодези зурагзүйн газрын дарга А.Хүрэлшагайг олон нийт “Бэрэн групп”-ийн захирал гэдгээр нь илүү мэднэ. Сүүлийн арваад жил идэвхтэй үйл ажиллагаа явуулсан энэ компани Монголын барилгын салбарт сайн ч, саар ч нэрийг дуулсаар ирсэн юм.

Захирал нь гэнэт агентлагийн даргаар дэвшихэд хартай нэг нь “Харав уу, өнөөх Бэрэнгийн Хүрэлшагай чинь авлига өгөөд албан тушаалд оччихлоо...” гэж байлаа. Мөн А.Хүрэлшагайн намтарт төрд ажилласан түүх ховор... гээд л бичицгээж байв. Харин тэрээр “амьдрал” дээр Газрын харилцаа, геодези зураг зүйн газарт шинэ хүн биш ажээ.

Тэрээр 1979 онд аравдугаар ангиа төгсөөд Дарханы политехникумд инженерийн геологийн мэргэжлээр суралцсан. Сүхбаатарын нэрэмжит цалинтайгаар онц төгсөөд Москвагийн Геологи Хайгуулын дээд сургуульд элсэн суралцаж,  инженер геологи, гидрогеологи мэргэжлээр, төгсчээ. Энэ мэргэжил бол эрдэс баялаг олборлох, хот байгуулах зэрэг эдийн засгийн томоохон төсөл, бүтээн байгуулалтыг хэрэгжүүлэхдээ тухайн газар нутгийн гео системийг иж бүрэн судалж, зүй тогтол, горимыг тодорхойлдог үүрэгтэй гэж өөрөө тайлбарлажээ. А.Хүрэлшагайг 1988 онд сургуулиа төгсөөд эх орондоо ирэхэд ардчилсан хувьсгалын салхи сэвэлзээд эхэлчихсэн, үндсэндээ зах зээлд шилжиж эхэлж байсан гэсэн. Ирээд Барилгын зургийн институтэд ажиллажээ. Энэ нь сүүлд “Барилгын инженер хайгуул, үйлдвэрлэл шинжилгээний институт” гэсэн нэртэй болоод хувьчлагдсан байна. Тэр үед мань хүн “Байгаль орчны хяналтын улсын хороо”-ны даргад өргөдөл гаргаж хэдэн сайн инженер залуу цуглуулж аваад Монголын анхны Геоэкологийн хүрээлэн байгуулсан гэж байгаа. Гэсэн ч 1995 онд Засгийн газрын бүтэц өөрчлөгдөөд Геоэкологийн институт татан буугдаж Шинжлэх ухааны академийн харъяанд дахин шинээр байгуулагджээ.

Тэгж явсаар 2004 онд Барилга хот байгуулалтын яамны Газрын харилцаа, геодези зураг зүйн газарт дэд даргаар хэсэгхэн хугацаанд ажиллаж. Тэр үед 40000 айлын орон сууц хөтөлбөр хэрэгжиж эхлэх гээд бөөн ажил байсан. Энэ ажилд гар бие оролцсон гэж байгаа.  Дараа нь металлург, хүнс, хөдөө аж ахуй, барилга үл хөдлөх хөрөнгө гэсэн гурван үндсэн чиглэлээр ажилладаг өнөөх “Бэрэн групп”-ээ байгуулжээ.

Түүнээс хойш “Бэрэн групп”-ээ удирдаж ажилласаар дэд дарга нь байсан ГХГЗЗГ-таа жил гаруйн өмнөөс жинхэнэ даргаар нь ажиллаж буй аж.

А.Хүрэлшагай дарга хэл аманд орооцолдохгүй. Хэрүүл тэмцэлд оролцохгүй. Нэг тийм чимээгүйхэн шиг ажиллах... Тэгэхдээ түүний хариуцсан газар төсөв хөрөнгө сайтай, басхүү өөрсдөөсөө тендер зарладаг гэж байгаа. Аргагүй газар, хот төлөвлөлт гэдэг өнөөдрийн Монголын  хамгийн эрэлттэй, хэрэгцээтэй асуудал болоод байхад. Өөрийнх нь хэлснээр ...Газар бол эдийн засгийн үндсэн хэрэгсэл. Ёстой нөгөө алга дарам газрын амтыг үзэж, Эрнандо дө Сото хэмээх агуу эдийн засагчийнхаар бол “Капиталын нууц”-ыг нээх цаг эхэлж байна шүү дээ...