Д.БОЛОР

Өнгөрсөн оны сүүлчийн хэдэн өдрийн хамгийн завгүй хүнээр Цагдаагийн ерөнхий газрын дарга Б.Билэгт тодорчээ. Цагдаагийн хурандаа цолоо амжиж авах гэсэн дэд хурандаа нар Б.Билэгтийг өрөөнөөс нь ч цухуйлгалгүй “дарсан” сурагтай.

Б.Билэгт өмнө нь Тагнуулын ерөнхий газрын дарга байсан. Ширүүн дарга байсан гэж байгаа. Цагдаад ч гэсэн нөгөөх л ширүүнээрээ л үзэж байгаа гэсэн. Ер нь түүний амьдралын түүхийг харвал эрс шийдлүүд ихээхэн харагддаг. Түүний ажлын гараа Улаанбаатар хотын Мах бэлтгэлийн конторт ачигч, ТЭЦ-2 цахилгаан станцад слесарь, “Сонсголон” элс, хайрганы завод, СОТ-2 барилгын трестэд нягтлан бодогчоор эхэлсэн. Улмаар “Ардчилал” сонинд улс төрийн ажилтан, сурвалжлагч, ХААҮЯ-ны Гадаад харилцаа, эрх зүйн газрын дарга, Монголын радио, телевизийн Хэрэг эрхлэх газрын дарга, Үндэсний аюулгүй байдлын зөвлөлийн Ажлын албаны дарга гээд л үргэлжилнэ. 

Одоогийн Ерөнхийлөгч Ц.Элбэгдорж, Хотын дарга Э.Бат-Үүл нартай мөр зэрэгцэн жагсч тэмцэж, Монголд ардчиллыг авчирсан алтан хараацайнуудын нэг гэдэг юм. Энэ утгаараа өдгөө АН-ын МоАХ хэмээх фракцад харьяалагдаж буй.

Б.Билэгтийг ЦЕГ-ын дарга болоход, улс төрийн томилгоо боллоо, цагдааг мэдэхгүй хүнийг томиллоо  гэх яриа гарч байсан нь нууц биш. Б.Билэгт энэ албанд очиж, улмаар генерал болж авсан. Тэрээр анхны ам дамжсан яриа шиг зүгээр нэг сул дарга болсонгүй. Нөгөөх л ширүүнээрээ, бас шинэчлэл ярьчихсан. Цагдаагийн даргаар томилогдсон даруйдаа “Би энгийн байхыг хүсч байна. Цагдаа гэхээр айдаг биш иргэд хайрладаг, ханддаг байгууллага  болох ёстой. Цагдаад шинэчлэл дутаж байна” гэж мэдэгдсэн. Б.Билэгтийг дарга болсноос хойш цагдаа нар анх удаа иргэнээсээ уучлалт гуйж байлаа. Хэрэв та санаж байвал одоогоос жилийн өмнө Чингэлтэй дүүргийн Цагдаагийн нэгэн тасгийн хамт олон албан хаагч нь зүй бусаар харилцсаны төлөө иргэнээс уучлалт гуйсан. Энэ бол яахын аргагүй шинэ үзэгдэл байв. Үнэхээр ч тэр шинэчлэл хийж яваа. Цагдаагийн хуучин дарга нарыг зоригтой өөрчилж оронд нь шижигнэсэн залуусаар хүч сэлбээд байгаа юм. Үүнийг нь зарим хүн “Цагдааг өөрийнхөө хүнээ дүүргэлээ” гэж шүүмжилж л байна. Гэвч тэр үүнийг огт тоохгүй, эмзэглэхгүй.

Харин хэрэгжиж эхлээд гуравхан хонож байгаа Цагдаагийн албаны тухай шинэ хууль Б.Билэгтээр цагдаа дахь шинэчлэлийг хийлгэх нь нэгэнт тодорхой болжээ. Учир нь энэ хууль цагдаагийн албан хаагчдын эрх мэдэл, зэрэг зиндааг үгүй хийсэн учраас таатай хандах хүн ховор байгаа гэх. Ямартаа л хурандаа цолоо авчихвал хувь заяа мэдэг гэсэн үг гарахав. Тэр утгаараа Б.Билэгт  дарга байсан энэ үед Монголын цагдаагийн түүхэнд тааруухнаар тэмдэглэгдэж үлдэх магадлалтай.