Төрөөс хуваарилсан улсын төсөв, Монгол Улсыг баялгийг иргэдэд хэрхэн хүргэх, түүний хэрэгжилтийг хянахад гол үүрэг гүйцэтгэдэг эрхмүүдийн нэг яах аргагүй Сангийн яамны Төрийн нарийн бичгийн дарга байдаг. “Хэн нь хэн бэ?” булан энэ удаад Сангийн яамны Төрийн нарийн бичгийн дарга Х.Ганцогтыг танилцуулж байна. Монголыг нэг айл өрх гэж үзвэл тэдний авдрыг сахиж, түүн доторх хөрөнгийг гэр бүлийн гишүүн бүрт ижил тэгш хуваарилж, зөв зүйлд чиглүүлэх эздийн нэг Сангийн яамны Төрийн нарийн бичгийн дарга байдаг аж. Тус яам энэ онд салбартаа хэд хэдэн өөрчлөлтийг эхлүүлсэн нь төсвөө иргэдээр хэлэлцүүлж, түүний хэрэгжилтийг тэдэнд нээлтэй хүргэх, орон нутгийн төсвийн эрхийг хөдөөгийнхөнд өгснөөр энэ салбарт шинэ зүйл бий болсон гэдэг. Энэ бүхэн хүмүүсийн амьдралд хүрч, ажил болоход бас нэг толгой болог гэж  Х.Ганцогтыг өнгөрсөн онд энэ албанд томилжээ. Х.Ганцогтыг шинэчлэлийн Засгийн газрын “Монгол Улсын эдийн засаг, санхүүгийн салбарт шинэчлэл хийнэ” гэсэн амлалттай зэрэгцэн энэ албанд очиход “Өөрчлөлтийн өмнө хариуцлагатай албанд очсон залуу удирдлага их зүйл хийх нь гарцаагүй” хэмээн үе үеийн эдийн засагчид үзэж байв. Тэрээр 23 насандаа Сангийн яаманд хөл тавьж, ажлын гараагаа Төсвийн бодлогын газрын Худалдан авах ажиллагааны хэлтсийн ажилтнаар эхэлжээ. Харин хамгийн түрүүлж хийсэн удирдах ажил нь 25-тайдаа томилогдсон тус яамны Худалдан авах ажиллагааны зохицуулалтын газрын даргын алба байжээ. Залуу боловсон хүчин, удирдлагын 10 гаруй жилийн хөдөлмөр тус яаманд чиглэжээ. Мөн тэр 2006-2007 онд Монгол дахь Мянганы сорилтын сангийн Худалдан авах ажиллагааны мэргэжилтнээр ажиллаж байсан юм. Х.Ганцогт Санхүү эдийн засгийн дээд сургуулийг Бизнесийн удирдлага, эдийн засгийн чиглэлээр бакалавр, Австралийн үндэсний их сургуулийг Бизнесийн удирдлага, санхүүгийн чиглэлээр мастерын зэрэгтэй төгсчээ. “Төсөв дэх бэлнээр тараах мөнгөний хувь тийм ч нүдээ олсон хуваарилалт биш. Үүнээс болж төсвийн орлого, зарлагад гажуудал бий болсон” хэмээн үзэл бодлоо илэрхийлсэн түүний ажилдаа баримталдаг зарчмуудын нэг төсвийг хүн бүрт ил тод хүргэх аж.