С.САРУУЛ Манай улсад хуурамчаар үйлдэгдэж буй мөнгөн тэмдэгтүүд нь ихэвчлэн хамгийн өндөр дүнтэй 5.000, 10.000, 20.000-тын дэвсгэртүүд  байдаг тул Монголбанк  эдгээр дэвсгэрт дээрх I түвшний хамгаалалт болох иргэд энгийн нүдээр шууд хараад түвэггүй таних боломжтой элементүүдийг сайжруулах ажлыг хийж байна.  Энэ хүрээнд  эхний ээлжинд нөөцийг нь дахин бүрдүүлэх хугацаа нь болсон 5.000 төгрөгийн дэвсгэртийг  олон улсын хэмжээнд судалгаа хийсний үндсэн дээр сүүлийн үеийн шинэ технологиор хийгдсэн элементийг уг дэвсгэртэд оруулан сайжруулж, шинэчилсэн хувилбарыг гаргахаар болжээ. Хамгаалалтын таних тэмдгийн гол шинж чанар нь хуурамчаар хийх бараг боломжгүй технологи буюу дуурайлган хийх тохиолдолд өндөр зардалтай байдаг аж. Шинэ таних тэмдэгтэй болсон 5.000 төгрөгийн дэвсгэртийн хувьд нүүрэн талд байрлах Соёмбонд сүүлийн үеийн дэвшилтэт технологиор хийсэн гурван хэмжээст(3D) хөдөлгөөнтэй, дээш, доош налуу хөдөлгөхөд өнгө нь солонгорч харагдах Спарк бэхэн элемент оруулж өгснөөр иргэд энгийн нүдээр хараад жинхэнэ тэмдэгтийг хуурамчаас ялгаж танихад хялбар болжээ.  Ийнхүү шинэчлэгдсэн 5.000 төгрөгийн дэвсгэртийг бэлэн мөнгөний гүйлгээнд гаргахаар бэлтгэл ажлуудыг Монголбанк арилжааны банкуудын хамт хийсэн бөгөөд Монголбанкны Ерөнхийлөгчийн холбогдох тушаалын дагуу 2019 оны нэгдүгээр улиралд гүйлгээнд гаргахаар төлөвлөж байна. Гэхдээ шинэчилсэн хувилбараар үйлдвэрлэгдсэн 5,000 төгрөгийн дэвсгэрт гүйлгээнд гарсан ч одоо гүйлгээнд явж буй дэвсгэрт хүчин төгөлдөр хэвээр хэрэглэгдэх юм байна. Эх сурвалж: www.polit.mn