Ц.БАЯР Нийслэлийн ИТХ товлосон ёсоор өнөөдөр /11.29/ хуралдаж 2019 оны төсвийн төслийн эхний хэлэлцүүлгийг хэлэлцэх ёстой. Чуулганы ирц бүрдэхгүй цагаасаа хоцорч эхэлсэн ч хэлэлцүүлэг эхэлсэн. Үдээс өмнөх хуралдаанаар Төрийн аудитын газраас төсвийн орлогын бүрдүүлэлт давсан гүйцэтгэлтэй байна. Татварын орлогыг барагдуулснаар ирэх оны төсвийн орлогыг нэмэгдүүлэх боломжтой. Нийтийн эзэмшлийн зам, талбайд байрлуулсан сурталчилгааны болон хаягийн байгууламжийн төлбөрийг бүрдүүлээгүй зөрчил илэрсэн. Нийслэл, дүүргийн төсвийн зарим байгууллагын бүтэц орон тоо, ажлын давхардлыг арилгуулснаар ирэх оны төсвийн зарлагыг бууруулах боломжтой. Ирэх онд зураг, төсөвгүй ажил санхүүжүүлэхгүй байх, үр ашиггүй, алдагдалтай ажиллаж буй аж ахуйн нэгжийн үйл ажиллагаанд анхаарах шаардлагатай. Нийслэлийн Төрийн аудитын газраас ирэх оны төсвийн орлогыг зургаан тэрбум төгрөгөөр нэмэгдүүлж, зарлагыг нэг тэрбум төгрөгөөр бууруулах санал гаргаж байгааг дуулгасан. Иймээс төсвийн хэлэлцүүлгийг хийх шатанд Аудитын байгууллагаас гаргасан энэ мэт саналыг тусгавал ирэх оны төсөв илүү чамбай болно гэж төлөөлөгчид үзэж байлаа. Эх сурвалж www.polit.mn