Ц.БАЯР  Нийслэлийн 2019 оны төсвийн төслийг өчигдөр НИТХ-ын тэргүүлэгчдэд өргөн барилаа. Хурлын дэгийн дагуу энэ сарын 29-ны өдөр  эхний хэлэлцүүлгийн товийг зарлажээ.Төсвийн төслийн талаар Нийслэлийн ЗДТГ-ын  Санхүү, төрийн сангийн хэлтсийн  дарга Э.Ганхүүгээс  тодрууллаа.   -Улаанбаатар хотын ирэх оны төсвийн төсөл өмнөх жилийнхээс юугаараа онцлог болсон бэ? -2019 оны Нийслэлийн төсвийн төсөл УИХ- дээр хоригтой байсан. Хоригийг хүлээж  авах, эсэх нь  мөн тодорхойгүй байлаа. Энэ сарын 23-нд  УИХ хоригийг хүлээж авахгүй гэсэн шийдвэр гаргасны дагуу Сангийн яамнаас нэгдсэн төсвийн төслийн тоог авсан. Ингээд  дахин боловсруулж  өргөн барьсан юм. Ирэх оны төсөв  ерөнхийдөө цалингийн нэмэгдэлд чиглэсэн.  Дээр нь  Улаанбаатар хот  800 гаруй тэрбум төгрөгийн орлого төвлөрүүлнэ. Үүнээс   улсын төсөвт  289 тэрбум  төгрөгийг оруулж,  500 орчим сая төгрөгийн урсгал зардалтай ажиллахаар төсвийн төслийг боловсрууллаа. -2018 оны төсөвтэй харьцуулахад  орлого төвлөрүүлэлт болон зардал нэмэгдсэн байх шиг? - Орлого төвлөрүүлэлт өмнөх оноос нэмэгдсэн гол үзүүлэлт нь хадгаламжийн хүүнээс татвар авдаг болсонтой холбоотой. Татвар төвлөрүүлэлт тодорхой хэмжээгээр өссөн учраас тэр дүнгээрээ өссөн. Жил болгон инфляци болон бусад хүчин зүйл татвар төлөлтийн өмнөх онуудтай харьцуулсан харицуулалтаар тодорхой төвшнөөр хувьчилж өсгөдөг. Одоогоор ИТХ-д өргөн барьсан учраас эцсийн тоог хэлэх боломжгүй. Ямар ч байсан хуулийн хугацаанд өргөн барьсан. Эхний хэлэлцүүлгээс нээлттэй болно. Эх сурвалж: “Зууны мэдээ” сонин