Д.ОЮУНЧИМЭГ МҮХАҮТ, Нийслэлийн Засаг даргын Тамгын газар хамтран зохион байгуулж буй “Улаанбаатар түншлэл-2018” олон улсын намрын үзэсгэлэн худалдаа Мишээл экспо төвд болж байна. Энэ талаар МҮХАҮТ-ын маркетинг, олон нийттэй харилцах газрын дарга П.Анхтуяатай ярилцлаа. -“Улаанбаатар түншлэл-2018” үзэсгэлэн өнгөрсөн жилүүдийнхээс ялгарах онцлог юу вэ? -43 дахь жилдээ зохион байгуулагдаж байна. Энэ удаагийн үзэсгэлэн Ази, Номхон далайн орнуудын “Худалдаа, Аж үйлдвэрийн Танхимуудын нэгдсэн холбоо”-ны ерөнхийлөгч Джамал Инайшвилигийн айлчлалын хүрээнд болж буйгаараа онцлогтой. Үзэсгэлэн дөрөв хоног үргэлжилж маргааш өндөрлөнө. Энэ үеэр хүнсний үйлдвэрлэлийн шилдгийг шалгаруулах, дотоодын аж ахуйн нэгж байгууллагуудын үйлдвэрлэсэн бүтээгдэхүүнийг сурталчлах, тэдгээрийн үйл ажиллагааг дэмжих, олон улсын зах зээлд өрсөлдөх чадварыг нэмэгдүүлэх, түншийн харилцаа холбоо тогтооход тус дөхөм үзүүлэх учиртай. - Сүүлийн жилүүдэд үйлдвэрлэлийг дэмжих бодлого, хөтөлбөрүүд хэрэгжсэний үр дүнд экспортлох боломжтой бүтээгдэхүүнүүд нэмэгдсэн. Энэ удаагийн үзэсгэлэнд ямар компаниуд оролцож байгаа вэ? -Үзэсгэлэн худалдаанд нийт 100 гаруй аж ахуйн нэгж оролцож байна. Дотоодын үйлдвэрлэгчдээс гадна Тайванийн 10 гаруй аж ахуйн нэгж үзэсгэлэнд оролцож байна. Түүнчлэн Тайванийн “Экзим” банк экспорт, импортыг дэмжихээр оролцож байна. Түүнээс үзэсгэлэнд оролцож байгаа компаниуд хамтын ажиллагаагаа өргөжүүлэх, гадны зөвлөх компаниуд манай улсын үйлдвэрлэгчдэд зөвлөгөө өгч байгаа. -Олон улсын үзэсгэлэнд оролцож байгаагийн давуу талыг тодорхойлж өгнө үү. Учир манай бизнес эрхлэгч, үйлдвэрлэгчид үзэсгэлэнд оролцох гол зорилго нь тухайн өдрүүдэд бараа бүтээгдэхүүнээ борлуулахад анхаарлаа хандуулж байх шиг анзаарагддаг? -Дэлхийн төвшинд зохион байгуулагдаж буй үзэсгэлэнд оролцож байгаа компаниуд бараа бүтээгдэхүүнээ сурталчлах, хамтарч ажиллах түншээ олох зорилготой оролцдог. Харамсалтай нь манай үйлдвэрлэгчид энэ төвшинд хүрээгүй байна. Ихэвчлэн бараа бүтээгдэхүүнээ борлуулахад илүү анхаарч байгаа энэ байдлыг өөрчлөх шаардлагатай. Тэгэхээр үзэсгэлэн зохион байгуулахдаа олон улсын төвшинд хүргэхийг зорих нь зүйтэй юм. Ингэснээр эдийн засагт дорвитой өөрчлөлт гарах боломж бүрдэнэ. Мэдээж тодорхой хугацаа орно. Түүнчлэн зохион байгуулагч болоод оролцогчид тухайн оролцох үзэсгэлэнд ямар зорилгоор оролцох гэж байгаагаа тодорхойлох учиртай. Үзэсгэлэнгээр худалдааг чухалчлах уу, хамтын ажиллагаагаа өргөжүүлэх боломжийг эрэлхийлэх үү гэдгээ харилцан ярилцаж тогтох нь зүйтэй. Үүний дараагаар бид олон улсын стандарт шаардлагад нийцсэн үзэсгэлэн, худалдааг зохион байгуулах тухай ярьж болох юм. Эх сурвалж: www.polit.mn