Д.Чимэг Азийн хөгжлийн банк болон Монгол Улсын Засгийн газар 207 сая ам.долларын зээлийн гэрээ байгуулав. Үүгээр нийслэлийн агаарын чанарыг сайжруулах, боловсролын чанар, хүртээмжийг тогтвортой байлгах, хөгжлийн бэрхшээлтэй иргэдийн нийгмийн оролцоог нэмэгдүүлэх төслийг хэрэгжүүлэх юм байна. Монгол Улсын Засгийн газрыг төлөөлж Сангийн сайд Ч.Хүрэлбаатар, АХБ-ыг төлөөлөн Монгол Улс дахь Суурин төлөөлөгч Ёланда Фернандез Ломмэн нар гэрээнд гарын үсэг зурав. Түүнчлэн гарын үсэг зурах ёслолд Боловсрол, соёл, шинжлэх ухаан, спортын сайд Ц.Цогзолмаа, Хөдөлмөр, нийгмийн хамгааллын сайд С.Чинзориг нар оролцлоо. Энэ үеэр “Эдгээр төслүүд нь ард иргэд, тэр дундаа хөгжлийн бэрхшээлтэй иргэдэд тэгш боломж олгох, хүртээмжтэй өсөлтийг хангахад чиглэсэн АХБ болон Монгол Улсын хамтран хэрэгжүүлэх Түншлэлийн стратегийн үзэл баримтлалтай нийцсэн төсөл юм” хэмээн хатагтай Фернандез Ломмэн хэлээд “Бид боловсролын чанар ба хүртээмжийг нэмэгдүүлэх, мөн улс орны өмнө тулгарч буй томоохон асуудал болох агаарын бохирдлыг шийдвэрлэхэд дэмжлэг үзүүлэх замаар ард иргэдийн амьдралын чанарыг дээшлүүлэхэд Засгийн газартай нягт хамтран ажиллах болно” хэмээн онцлов. Ингээд зээлийн санхүүжилтээс 130 сая ам.долларын агаарын чанарыг сайжруулахад зарцуулах бөгөөд хууль эрх зүйн орчныг боловсронгуй болгох бодлогын шинэчлэлийг дэмжихэд чиглэх аж. Зээлийн санхүүжилтээр утаа багатай түлшийг нэвтрүүлэхэд төсвийн зарцуулалтыг чиглүүлж Улаанбаатар хотын оновчтой төлөвлөлт, цэвэр түлш, ногоон хөгжлийг дэмжихэд чиглэсэн урт хугацааны тогтолцоог бий болгоход дэмжлэг үзүүлнэ гэлээ. Харин боловсролын салбарт хэрэгжих төслөөр сургууль, цэцэрлэгийн хүүхэд хүлээн авах хүчин чадлыг нэмэгдүүлэх юм байна. Багш, сургалтын менежер, боловсролын асуудал хариуцсан нутгийн захиргааны ажилтнуудын чадавхыг бэхжүүлэх зэрэг ажлууд мөн хийгдэнэ. Төслийн хүрээнд шинээр баригдах болон өргөтгөх 34 сургууль, цэцэрлэгт элсэн суралцах 15 мянга гаруй хүүхэд төслийн өгөөжийг шууд хүртэх аж. Түүнчлэн гурав дахь төслийн хүрээнд хөгжлийн бэрхшээлтэй иргэдийн хөдөлмөр эрхлэх, хөгжлийн бэрхшээлтэй хүүхдүүдийг эрт илрүүлэн эрүүл мэнд, нийгмийн үйлчилгээг хүргэхэд чиглэгдэх юм байна. Нийтийн үйлчилгээний байгууллагуудын дэд бүтцийг засварлан хөгжлийн бэрхшээлтэй иргэдэд ээлтэй болгох, тэдэнд зориулсан сэргээн засах төвүүдийг барьж байгуулах ажлыг хийх юм байна. Энэ зээлийн төслийг ядуурлыг бууруулах Японы сангаас олгох хоёр сая ам.долларын буцалтгүй тусламжийн төсөлтэй хамтран хэрэгжүүлнэ гэв. Эх сурвалж: www.polit.mn