Г.НАСАНБААТАР Оюутолгой компани Эрсдэлийг таниулах сургалтын төвтэй боллоо. Энэ төв нь ажлын байранд түгээмэл тохиолддог эрсдэлүүдийг аюулгүй орчинд хүмүүст мэдрүүлж, таниулан ойлгуулах зорилготой юм. Улаанбаатар хотноо байгуулж буй төв нь олон нийтэд аюулгүй ажиллагааг хэвшүүлэх чиглэлээр тус компаниас хэрэгжүүлж буй томоохон ажил хэмээн мэргэжилтнүүд онцлов. Нээлтийн үеэр Оюутолгой компанийн гүйцэтгэх захирал Армандо Торрес “Бид үйлдвэрлэл, үйл ажиллагаандаа анхаарахын зэрэгцээ аюулгүй ажиллагааг тэргүүлэх чиглэлд тооцсоноор бүх гэмтэл бэртлийн давтамжийн үзүүлэлтээ тогтвортой сайжруулсан. Уурхайд 2013 онд “Эрсдэлийг таниулах төв”-ийг нээн компанийн болон гэрээт ажилчдын заавал хамрагдах сургалтын нэг хэсэг болж, үйлдвэрлэл, амьдралд түгээмэл тохиолддог ноцтой эрсдэлүүдийг таниулах, урьдчилан сэргийлэх чиглэлээр мэдлэг олгодог. Одоогийн нээж байгаа төв нь олон нийтэд нээлттэй үйл ажиллагаа явуулах юм” гэв. Энэ үеэр сургалтын хэлтсийн сургагч багш нар цахилгаан гүйдэлд цохиулах, дээрээс биет унах, энерги хяналтгүй чөлөөлөгдөх, тээврийн хэрэгсэлд мөргүүлэх, тээглэх, орооцолдох, хавчуулагдах, тээврийн хэрэгсэл мөргөлдөх, онхолдох зэрэг эрсдэл болон амь насаа хамгаалах зургаан дүрэм, ухаан үнэлгээг хэрхэн хийх талаар танилцуулсан юм.