Т.САЙХАН 2017 оны төсвийн орлого  500 тэрбум төгрөгөөр давсан, зарим хөтөлбөр санхүүжилтгүй болсон зэргээс шалтгаалж төсөвт тодотгол хийж байгаа билээ.  Энэ хүрээнд 290 тэрбум төгрөгийг зөвхөн Алтай-Дарви чиглэлийн 165 км авто замын концессын гэрээний төлбөрийг шийдэхээр тусгаад байна. Энэхүү гэрээг Н.Алтанхуягийн Засгийн газрын үед хийж байжээ.  Мэргэжлийн Засгийн газар Ерөнхийлөгчийн сонгуулийн өмнөхөн хүүхдийн мөнгийг 100 хувь олгох шийдвэр гаргасан. Ингэхдээ эх үүсвэрийг төсөвт суулгаагүй тул шаардлагатай санхүүжилт болох 104,5 тэрбум төгрөгийг мөн тодотголоор суулгаж байна. Үүнээс гадна анхаарал татаж буй төсвийн зардал бол төрийн албан хаагчийн халаа сэлгээний нөхөн төлбөрт 8,8 тэрбум төгрөг олгохоор болжээ. Энэхүү зардлыг шүүхийн шийдвэрийн дагуу аж ахуй нэгж, иргэнд олгох нөхөн төлбөр нэрээр тодотголд суулгасан байна.  Энэ мэтчлэн 2017 оны төсвийн тодотголд 19 төрлийн зарлага нэмэгдүүлэхээр тусгасан байна. Төсвийн тодотголын асуудлыг энэ долоо хоногт УИХ-аар чуулганаар хэлэлцэх товтой байна.  АН-ын бүлгийн хувьд энэ асуудал дээр сөрөг байр суурьтай байгаа. 500 тэрбум төгрөгийг хүний хөгжилд зориулах ёстой гэж үзэж байгаа юм. Эх сурвалж:www.polit.mn