Төслийн ахлах зөвлөх Ямашита Мамору      

Энэ дугаарт, байгууллагын ажилтнууд өөр хоорондоо тогтмол мэдээллээ солилцох нь ямар ач холбогдолтой байдаг талаар өгүүлэх болно.

Байгууллага дотор бүх ажлыг сайн мэддэг туршлагатай ажилтан байлаа гэж бодъё. Ажилдаа гаршсан түүнд дарга нь байнга ажил даалгаж, итгэл хүлээлгэх учир тэр ажилтан хичээл зүтгэл гарган ажилдаа шамдана.

Олон байгууллагад ийм ажилтан байдаг болов уу. Гэвч энэ нь нөгөө талаар том эрсдэлийг дагуулж байдаг. Яагаад вэ?

Чадварлаг ажилтан “ганцаараа” хичээн ажиллаж өндөр үр дүн гаргах нь сайшаалтай боловч хэрэв тэр хүн ямар нэг шалтгаанаар ажлаасаа гарвал яах вэ? Туршлагатай, шилдэг ажилтанг өрсөлдөгч компани өндөр цалин амлан ажиллуулах явдал ч олон бий. Мөн хэт ачаалалтай ажиллаад ядрах, өвдөх асуудал ч гарч болно. Цөөн тооны шилдэг ажилтанд хэт их ажил даатгах нь нэг талаар байгууллагын үйл ажиллагаанд сөргөөр нөлөөлөх эрсдэлийг дагуулдаг.

Ялангуяа олон ажилтантай байгууллага дээрх эрсдэлээс сэргийлж, менежер нь ажилтнууддаа мэдээллээ солилцох ажлыг хэвшүүлэхэд анхаарах шаардлагатай юм. Мэдээллээ тогтмол солилцох нь дараах ач холбогдолтой.

Нэгт, нэг чадварлаг ажилтанд хэт найдах “эрсдэл”-ээс сэргийлнэ. Хоёрт, мэдээллээ тогтмол солилцсоноор байгууллагын нэгдмэл байдал бий болно. Байгуулллагын дарга зөвхөн нэг хүнд итгэл хүлээлгээд, байнга тэр хүндээ ажил даатгаад байвал бусад ажилчдын идэвх суларч, байгууллагын уур амьсгал тааламжгүй болдог. Тиймээс мэдээлэл солилцох замаар бүгдээрээ хамтарч ажиллах нь чухал юм.

Гуравт, ажлын үр өгөөж дээшилнэ. Мэдээлэл солилцсоноор хийж буй ажлаа бусаддаа танилцуулахаас гадна бусад ажилтнууд ямар ажил хийж буйг мэддэг тул ажил давхардахаас сэргийлдэг.

Миний сонссоноор Монголд засаг солигдох тоолонд төрийн албан хаагчид дахин сонгогддог гэсэн. Хэрэв тийм бол төрийн албан хаагч өөрийн мэдлэг, ур чадварыг бусадтай хуваалцахаас зайлсхийнэ. Хуваалцвал өөрийнх нь үнэ цэнэ буурах учраас тэр шүү дээ. Энэ байдал нь байгууллагын хөгжил дэвшил болоод иргэдийн амьдралд ч сайнаар нөлөөлөхгүй, Тиймээс байгууллагын менежер ажилтнуудыг мэдээлэл солилцох соёлд хэвшүүлэх, төрийн албан хаагч урт хугацаанд тогтвортой ажиллах орчин нөхцөлийг бүрдүүлэх хэрэгтэй болов уу гэж бодож байна.

Эх сурвалж: "Зууны мэдээ" сонин