Б.НЯМСҮРЭН

Зургаадугаар сарын 14-нд хэд хэдэн улсын төрийн тэргүүн, удирдагч нарын төрсөн өдрийн баяр болдог. Монгол Улсын ерөнхийлөгч У.Хүрэлсүх, АНУ-ын ерөнхийлөгч Дональд Трамп нар энэ өдөр төрсөн бол Их Британийн хаан Чарльзын албан ёсны төрсөн өдрийг энэ жил тэмдэглэв. Мөн энэ өдөр Германы экс канцлер Oлаф Шольц 68 нас хүрч байна.

Ерөнхийлөгч У.Хүрэлсүх энэ жил 58 нас хүрч байгаа бол АНУ-ын ерөнхийлөгч Трампын 80 насны ой мөн тохиож байна.

У.Хүрэлсүх 1968 оны зургаадугаар сарын 14-нд Улаанбаатар хотноо төрсөн. Монгол Ардын Намын дэргэдэх залуучуудын байгууллагаас улс төрийн карьераа эхлүүлж УИХ-ын гишүүн, Шадар сайд, Ерөнхий сайд зэрэг албан тушаалуудыг хашиж байгаад 2021 оны Ерөнхийлөгчийн сонгуульд ялалт байгуулан Монгол Улсын зургаа дахь төрийн тэргүүн болсон билээ.

Харин АНУ-ын ерөнхийлөгч Трамп 1946 оны зургаадугаар сарын 14-нд Нью-Йорк хотын Куинс дүүрэгт төржээ. Тэрбээр бизнесээс улс төрд орж, 2017-2021 онд АНУ-ын 45 дахь Ерөнхийлөгчөөр ажилласан бөгөөд 2025 онд дахин сонгогдон Цагаан ордонд эргэн ирсэн юм. Ингэснээр АНУ-ын түүхэнд хоёр өөр хугацаанд Ерөнхийлөгчөөр ажилласан цөөн удирдагчдын нэг болсон төдийгүй тус улсын түүхэнд хамгийн өндөр настайдаа төрийн тэргүүний албыг хашсан ерөнхийлөгч болов.

Их Британид жил бүрийн зургаадугаар сард зохион байгуулдаг хааны төрсөн өдрийн албан ёсны баяр болох Trooping the Colour ёслол энэ өдөр тохиож байна. Хэдийгээр Их Британийн хаан Чарльз арваннэгдүгээр сарын 14-нд төрсөн ч хааны төрсөн өдрийг олон нийттэй хамт тэмдэглэдэг уламжлалт ёслолын дагуу зуны улиралд зохион байгуулдаг уламжлалтай.

Ийнхүү зургаадугаар сарын 14-ний өдөр дэлхийн хоёр улсын төрийн тэргүүн болон Германы нөлөө бүхий удирдагч, мөн Их Британийн хааны төрсөн өдрийн албан ёсны ёслол зэрэг олон үйл явдал давхацсан бэлгэдэлтэй өдөр болж байна.

Эх сурвалж: www.polit.mn