“Polit.mn” сайт “Төрсөн өдөр”  буландаа зургаадугаар сарын 1-нд төрсөн өдөр нь тохиодог Монгол Улсын гурав дахь Ерөнхийлөгч Н.Энхбаярын тухай онцолж байна.

Тэрээр 1958 оны зургаадугаар сарын 1-нд Улаанбаатар хотод төржээ. 1965- 1975 онд 23 дугаар дунд сургуульд сурч төгсөөд 1975-1980 онд Москва хотноо М.Горькийн нэрэмжит Утга-зохиолын дээд сургуулийг Утга-зохиолын ажилтан, орчуулагч мэргэжлээр дүүргэсэн. 1985-1986 онд Их Британийн Лийдсийн их сургуульд англи хэл, утга зохиолын чиглэлээр суралцаж, МУИС-ийн англи хэлний курс төгссөн. Утга-зохиолын ажилтан, уран зохиолын орчуулагч мэргэжилтэй. Мөн дунд сургуульд сурч байхдаа бие даан төвд хэл судалсан гэдэг. 

Н.Энхбаяр 1985 онд МАХН-д гишүүнээр элсэж, улс төрийн замналаа эхлүүлсэн. 1992 онд анх улсын бага хурлын гишүүнээр сонгогдож, мөн тус оноос Соёлын сайдаар ажилласан. 1992, 1997, 2000, 2004 онуудад УИХ-ын гишүүнээр дөрвөн удаа дараалан сонгогджээ. Улмаар 2000 оны УИХ-ын сонгуульд намаа үнэмлэхүй ялалтад хүргэж, УИХ-ын 76 суудлаас 72-г нь МАХН-д авч чадсан байна. Тийнхүү долоодугаар сарын 26-нд ялсан намын тэргүүний хувьд Ерөнхий сайдаар томилогдсон юм.  2004 оны УИХ-ын сонгуульд МАХН үнэмлэхүй байр сууриа алдсан ч олон суудал авсан учраас  сөрөг намуудтай хамтарч Их эвслийн Засгийн газар байгуулагдахад Н.Энхбаяр 2004-2005 онд Улсын Их Хурлын даргаар сонгогдон ажилласан юм. Тэрээр 2005 оны Ерөнхийлөгчийн сонгуульд нийт сонгогчдын 65 хувийн санал авч үнэмлэхүй ялалт байгуулснаар Монгол Улсын гурав дахь Ерөнхийлөгчөөр сонгогдсон улстөрч билээ. 

Танд төрсөн өдрийн мэнд хүргэе. 

Эх сурвалж:www.polit.mn