“Фэйсбүүк”-ийг үндэслэгч, тэрбумтан Марк Цукерберг 1984 оны энэ өдөр буюу тавдугаар сарын 14-нд шүдний эмч Эдвин, физикч Карен нарын отгон хүү болон төрсөн. Түүний эцэг эх еврей үндэстэн бөгөөд ёс журмыг баримталсан гэр бүл ажээ.

Тэрээр багадаа компютерын дайны сэдэвт бүх төрлийн тоглоомоор тоглох дуртай, тоглоомтой холбоотой карт комикс цуглуулдаг байсан гэдэг. Андалины ахлах сургуульд суралцаж байхдаа 1997 онд Филлипс Экстерийн академи руу шилжин суралцсан. Марк бүх хичээлдээ сайн суралцаж байсан бөгөөд Латин, Грек, хятад хэлтэй. Анхныхаа программыг 13 настай байхдаа “Atari Basic Programming” нэртэйгээр зохиож байсан гэнэ. Түүний  аав нь хүүгийнхээ авьяасыг олж харан программ хөгжүүлэгч Давид Ньюменд танилцуулжээ. Бяцхан хүүгийн гоц авьяасыг олж харсан тэрбээр Маркийн багш болсон аж. Ахлах сургуульд орсон жилдээ Цукерберг “Zucknet” нэртэй программ зохиосон. Уг программыг аав нь шүдний эмнэлэгтээ ашиглаж ажлаа хийдэг байсан аж.

Марк Цукерберг худалдаанд “Synapse Media Player” анхны программаа гаргаж байсан бөгөөд энэ программ нь өөрийн хүсэл сонирхолд нийцсэн дуугаа ямар нэгэн нэмэлт үйлдэл хийхгүйгээр шууд сонсож болдог программ байжээ. Тус программ нь “Magazine” компаниас дөрвөн од үнэлгээ авч байсан. Үүний дараа “Microsoft” компаниас хамтран ажиллах санал ирсэн ч Харвардад элсэн суралцах урилгын улмаас энэ саналаас татгалзсан.

Марк Харвардад сурч байхдаа “Course Match” программаа зохиосон. Уг программаа улам сайжруулж, баяжуулан “Face Mash” нэртэй болгож зөвхөн найз нөхдийнхөө мэдээллийг л хамруулдаг байв. Долоохон хоногийн дараа Харвардын бүх сүлжээнд суулгасан бөгөөд тус сургуулийн оюутнуудын орох дуртай программын нэг болсон. Марк орой болгон программ дээрээ ажилладаг байв. Өрөөний найз Ари Хасит нь түүнд программынхаа нэрийг өөрчилж Facebook нэртэй болго гэж ятгадаг байжээ. Ийн 2004 арван хоёрдугаар сарын 4-ны өглөө "Facebook" нэр өгснөөр дэлхий даяар хамгийн олон хэрэглэгчтэй “Фэйсбүүк” сошиал сүлжээ анх бий болжээ. “Фэйсбүүк”-ийг үндэслэгч, тэрбумтан Марк Цукерберг танд төрсөн өдрийн мэнд хүргэе. 

Эх сурвалж:www.polit.mn