“Polit.mn” сайт “Төрсөн өдөр”  буландаа  дөрөвдүгээр сарын 19-нд төрсөн өдөр нь тохиож буй УИХ-ын гишүүн Ж.Чинбүрэнгийн  тухай онцолж байна.

Ж.Чинбүрэн 1972 оны  дөрөвдүгээр сарын 19-нд Улаанбаатар хотод төржээ. Аав, ээж нь хоёулаа Сүхбаатар аймгийн харьяат, эрдэмтэн. Аав С.Жигжидсүрэн нь Монгол орны бэлчээрийн өвс ургамлыг судалж, үрийн сан хөмрөг бүрдүүлж өвлүүлсэн нэгэн. Ээж Г.Надмид нь шинжлэх ухааны гавьяат зүтгэлтэн. Ноос, ноолуурынхан дундаа толгой цохидог эрдэмтэн хүн. Ж.Чинбүрэн эцэг эхээс ах дүү гурвуулаа, айлын дунд хүү.

Тэрээр 1980 онд 23-р тусгай дунд сургуульд элсжээ. Түүнийг Орос сургуульд оруулахын тулд аавынх нь нутгийн хуурай ах Шагдарсүрэн гэдэг хүн өдөр, шөнөжин дугаарлан байж бүртгүүлснээр Чинбүрэн шалгалт өгч тэнцсэн байна. Долдугаар ангиасаа сургуульдаа сурлагаар дээгүүр бичигдэх болж, төгсөх жилдээ тэргүүлэгчдийн эгнээнд жагссан байна. Доктор Ж.Чинбүрэн дүнгээр хөөцөлдөх буруу гэж үздэг, “Бурмаар тэтгэхээр урмаар тэтгэх” гэдэг үгэнд дуртай нэгэн.

Ж.Чинбүрэн эмч 23 жилийн туршид 1200 гаруй хүнд элэгний хагалгаа хийжээ. Хүнд хагалгаа нь 20 цаг хүртэл үргэлжлэх удаа бий. Дундчилж үзвэл өдөр шөнөгүй бүтэн жил элэг бүтэн Монголын төлөө мэс засал хийсэн гэсэн үг. Үүнээс элэг шилжүүлэн суулгах 21 удаагийн мэс засал хийжээ. Тэрээр улирал тутамд Орос, Казахстанд уригдаж, өндөр төлбөртэй мэс засал хийдэг, арга туршлага зааж сургадаг гэнэ. Орос, казахууд монгол эмчид багшлах биш шавилах болсондоо эхэндээ гайхан хүлээн авч байжээ.

Ийнхүү тэрээр 2020 оны Улсын Их хурлын сонгуульд өрсөлдөж,  МАН-аас гишүүнээр сонгогдож байв.   Саяхан цусны донорын тухай хуулийг парламентаар хэлэлцүүлсэн.  Мөн эмийн үнийн өсөлт, чанарт хяналт шалгалт хийх түр хороог ахалж эдгээр өдрүүдэд сонсголыг зохион байгуулж байна.  Танд төрсөн өдрийн мэнд хүргэе.

Эх сурвалж:www.polit.mn