Л.Хэрлэн 

АН болоод, Засгийн газарт  “Женко” Х.Баттулгаас зайгаа барих, түүний гар хөлийг зайлуулах их аяныг  шат шатандаа    хүчтэй өрнүүлж байна.

Зам тээврийн яамнаас гэхэд л саяхан  Төрийн нарийн бичгийн даргаар ажиллаж байсан Б.Батзаяаг гэнэт ажлаа нь халсан. Ямар үндэслэлээр халсан талаарх учрыг асуухад, хариуцлага алдсан гэсэн хоёр үгээр амыг нь тагласан гэж байгаа. Начир дээрээ бол түүнийг “Баттулгын хүн учраас Баттулгыгаа л бараадна биз” хэмээн ажлаас нь халсан гэх сураг дуулдсан. Үнэндээ Б.Батзаяагийн хувьд Х.Баттулгын бие хамгаалагчаар ажиллаж байгаад түүнийг  Зам тээвэр, барилга хот байгуулалтын яамны сайд байхад нь “Монголын төмөр зам”-ын захирал болж дэвшсэн нэгэн.  Харин дараа нь А.Гансүхийн үед Зам тээврийн яамны Төрийн нарийн бичгийн даргаар томилогдсон юм. Тэгэхээр хариуцлага алдсан нь ч чухал биш, Б.Батзаяа гэдэг хувь хүнд ч асуудал үгүй, гагцхүү тэр Х.Баттулгад зүтгэж явсан нь ийнхүү халагдах шалтгаан болжээ. Үүгээр ерөнхийдөө Зам тээврийн яаман дахь “Женко”-гийн хүмүүсийг “цэвэрлэх” их ажлын дөнгөж эхлэл тавигдаж байна гэж болох юм. Түүнчлэн  Үйлдвэр, хөдөө аж ахуйн яаманд ч ийм давалгаа үүсэх нь тодорхой гэдгийг улс төрийн хүрээнийхэн сүүлийн үед жиг жуг гэлцэх боллоо. Учир нь Х.Баттулга Үйлдвэр, хөдөө аж ахуйн сайдаар ажиллаж байх үедээ мөн л өөртөө үнэнчээр  зүтгэж ирсэн олон хүнийг ажилтай болгосон. Газар, хэлтсийн даргаас эхлээд түүний томилуулсан хүн ч олон бий. Тэгвэл одоо тэднийг ч мөн адил Б.Батзаяагийн араас явуулах нь гарцаагүй. Зах зухаас нь мэдэгдээд эхэлсэн гэх сураг ч дуулдаж байгаа юм. Ийнхүү АН, засаг хоёрт Х.Баттулгаас салах бодлого хуурай өвсний түймэр шиг тун хурдан  хэрэгжиж байна.