С.САРУУЛ

Түгжрэл хариуцсан сайд Ж.Сүхбаатар албаныхантай уулзан зарим ажлын явц, үр дүнгийн талаар мэдээлэл сонсож, үүрэг чиглэл өгчээ.

Уулзалтын үеэр нийслэлийн нийтийн тээврийн парк шинэчлэлийн ажлын хүрээнд шинээр орж ирж байгаа автобуснуудыг оновчтой чиглэлүүдэд хуваарилж, ачаалал ихтэй оргил цагуудад нийтийн тээврийн богино эргэлтийн давтамжийг нэмэгдүүлэн, чиглэлийн уян хатан зохицуулалт хийх ажил чухал байгаа. Иргэд аль болох автобусаа удаан хүлээхгүйгээр, тэдэнд түргэн шуурхай үйлчлэхэд онцгой анхаарч ажиллаж байна. Нийслэлийн нийтийн тээврийн газрынхан энэ чиглэлд зохицуулалт хийж буй ажлаа танилцуулжээ.

Энэ онд Нийслэлийн нийтийн тээврийн парк шинэчлэлийг 100 хувь хийх зорилго тавин ажиллаж байгаа. Нийтийн тээвэр саадгүй, түргэн шуурхай зорчиход нэгдүгээр эгнээгээ бүрэн чөлөөлөх журмын хэрэгжилт маш чухал. Өнгөрсөн арванхоёрдугаар сард хэрэгжүүлсэн “Нэгдүгээр эгнээг Нийтийн тээвэрт” арга хэмжээ үр дүнгээ өгсөн.

Цаашид Наадамчдын өргөн чөлөө, Чингисийн өргөн чөлөөгөөр ачаалалтай цагуудад автобуснуудыг нэгдүгээр эгнээгээр явуулах бэлтгэлийг хангах төлөвлөгөөтэй ажиллаж байгаа аж.

Харин Энхтайвны өргөн чөлөө дагуух замуудад байрлуулсан хяналтын камер, E-police аппликэйшн ашиглан иргэд олон нийтээс ирүүлсэн баталгаажсан зөрчлийн торгууль төлөлт хангалтгүй байгаа юм байна. 2022 оны нэгдүгээр сарын 1-ний өдрөөс арванхоёрдугаар сарын 31-ний өдрийн  байдлаар нийт 829943 зөрчил бүртгэгдсэнээс тал хувь нь нэгдүгээр эгнээгээр автомашин явсан зөрчлүүд эзэлж байна. Харамсалтай нь замын хөдөлгөөний дүрэм, журам зөрчсөн өөрөөр хэлбэл зам дээр танхайрсан жолооч нарын 70 хувь нь торгуулиа огт төлөөгүй байна. Энэ байдал нь цаашид торгуулиа төлөхөд хуулийн нарийвчилсан зохицуулалт шаардлагатай байгааг харуулж байгаа гэж ярилцсан байна.

Мөн уулзалтаар яригдсан бас нэг асуудал нь нэгдүгээр эгнээгээр  нийтийн тээврийг саадгүй зорчуулах үүднээс тусгайлсан хашлага хаалт хийх ажлын явцын мэдээллийг авчээ. Нийслэлийн авто замын хөгжлийн газраас танилцуулснаар энэ оны эхний улиралдаа багтаан Энхтайвны өргөн чөлөөний 1 дүгээр эгнээгээр зорчих хэсгийг тусгаарласан хашлага хийх ажил дуусгах юм байна.

Эх  сурвалж: www.polit.mn