П.АМГАЛАНБАЯР
“Зууны мэдээ” сонин энэ удаагийн "Хөгжим хэмнэл" буландаа Монголын хип поп урсгалд цахиур хагалж яваа авьяаслаг дуучин Rokit Bay буюу О.Баярсайханыг онцолж байна. Тэрбээр ирэх сарын 4-нд бие даасан “The Broken Souls" тоглолтоо хийхээр товлоод буй.
Урлагийн салбарт өндөрт хөөрч яваа “Пуужин Баяраа”
Монголын хип поп урсгал хэмээх том орон зайд тэрбээр Rokit Bay хэмээх нэрээр гарч ирсэн.Түүнийг тодотгох энэхүү нэр нь гурван утга санааг агуулж байгаа аж.
Нэрнийх нь хамгийн гол утга нь “Rock it Bay” буюу “доргиогоод өг”. Түүнийг Америкт байхад ойр дотныхон нь “Bay” гэж дууддаг байсан гэнэ. Энэ нь Баяраа нэрнийх нь эхний үе аж. Харин Rokit Bay буюу Пуужин Баяраа гэсэн нэрний учир нь эрсдэлтэй боловч амжилттай хөөрвөл хэний ч хүрээгүй газар очно гэсэн утгыг илэрхийлжээ. Харин тэрбээр өөрийн дуу хоолойгоо нэрнийхээ гурав дахь утгад шигтгэжээ. Учир нь “Raw kit Bay” гэдэг нь жинхэнэ дуугаралттай гэсэн санааг агуулж байгаа аж. Түүний дуу хоолойг “Хязгааргүй”, “Нэг өдрийн хаан”, “Эвдэрхий хүн”, The Broken Souls гэсэн өвөрмөц шийдэл, утга санаа бүхий дуунууд тодотгодог.
Түүний шинэ ертөнц "Онц дүмд"
Rokit Bay Монголын хамгийн анхны бүрэн хэмжээний анимэйшин цуврал болох "Онц дүмд"-ийг бүтээсэн. Хөгжилтэй, адал явдалтай, өвөрмөц шийдэл бүхий энэхүү анимэйшин Rokit Bay-ийн шинэ ертөнцийг нээсэн юм. Мөн “Хандгай-Өвгөн” хуурч анимейшныг бүтээсэн. Тэрбээр бүх дууныхаа үг аяыг өөрөө зохиож, CD-ний дизайн, клипнийхээ эвлүүлэг монтажийг өөрөө хийдэг аж.
Жүжигчин “Rokit Bay”
Тэрбээр урлагийн ертөнцөд олон өнгөөр хувьсаж, хөгжиж яваа нэгэн. Учир нь тэрбээр дэлгэцийн бүтээлүүдэд ажиллаж, үзэгчдээс сайшаал хүртсэн. Түүний дэлгэцийн анхны уран бүтээл бол Холливудын өлгий нутаг Лос-Анжелес хотод 2009 онд бүтээсэн “Маргаашгүй” уран сайхны кино юм. 17 настай хүүхдийн энгийн амьдралд гарч буй гэнэтийн өөрчлөлт түүнд хэрхэн нөлөөлж буйг харуулсан тус киноны гол дүрд ажилласан билээ. Мөн түүнээс гадна "Big fish", "Алтан ус", "Эцсийн зогсоол Э цэг" зэрэг кинонд мөн тоглосон юм.
Дэлхийн шоу нэвтрүүлгийн мэдрэмжтэй шүүгч
“Дэлхийн шилдгийн шилдэг” буюу “The Worlds best” шоу нэвтрүүлэгт тэрбээр шүүгчээр ажилласан. Тус шоу нь дэлхийн 38 орноос цугларсан 50 гаруй шүүгчтэй АНУ-ын CBS телевизийн томоохон уран бүтээл юм. Түүний дараагийн шүүгчийн замнал бол “Авьяаслаг монголчууд” дэлхийн хэмжээний шоу нэвтрүүлэг. Шоу нэвтрүүлгийн үеэр оролцогчдод хэлж буй сэтгэгдэл, урмын үг, өөрийнхөөрөө байдаг зан чанар нь түүнийг хайрладаг фенүүдийн тоог нэмсэн гэхэд хэлсдэхгүй. Мэдрэмжтэй, хөгжилтэй, гярхай зан чанар түүний дотор оршин буй бас нэгэн авьяаслаг шүүгч Rokit Bay-ийг тодотгож гаргасан юм.
Эх сурвалж: “Зууны мэдээ” сонин
2022 ОНЫ АРАВДУГААР САРЫН 21. БААСАН ГАРАГ. № 205 (6937)
