Б.ДАРЬСҮРЭН

УИХ-ын гишүүн, Хүнс, хөдөө аж ахуй, хөнгөн үйлдвэрийн сайд Х.Болорчулуун арьс, ширэн бүтээгдэхүүн үйлдвэрлэгчидтэй  уулзаж, санал сэтгэгдлийг нь сонслоо. 

Дэлхийд монгол малын арьс, шир чанараараа нэгдүгээрт тооцогддог. Үйлдвэрлэгчид дотооддоо боловсруулсан арьс, ширээр жилд дунджаар савхин бээлий 300 мянган хос, 500 мянга гаруй савхин цүнх, жижиг эдлэл, 5000 гаруй савхин малгай, 30 мянга гаруй савхин хувцас, 20 мянга гаруй нэхий хувцас, 400 мянган ширхэг хос гутал үйлдвэрлэдэг. Энэ салбарт 4200 гаруй ажилтан ажиллаж, баялаг бүтээж байна. Гэхдээ энэ салбарт тулгамдаж буй олон асуудал байгааг үйлдвэрлэгчид хэлж байлаа. Тухайлбал, Монголын арьс, ширний үйлдвэрлэлийн холбооноос бага оврын цэвэрлэх төхөөрөмж суурилуулсан үйлдвэрүүдэд бохир усны үнийн өөрчлөлт, хөнгөлөлтөд анхаарахыг хүслээ.  

Хүнс, хөдөө аж ахуй, хөнгөн үйлдвэрийн сайд Х.Болорчулуун “Мянга сонсохоор нэг үз гэдэг шиг арьс, шир үйлдвэрлэгчидтэйгээ уулзаж, төрийн ямар бодлого дутагдаж байгаа талаар санал солилцож байна. Манай улс дотоодын үйлдвэрлэлийг хөгжүүлж байж  инфляц буурч эдийн засагт эерэг нөлөөлөл үзүүлнэ. Энэ ч утгаараа Засгийн газар “Шинэ сэргэлтийн бодлого”-д аж үйлдвэрлэлээ хөгжүүлэх зорилт дэвшүүлсэн. Тиймээс арьс ширний салбарыг “Шинэ сэргэлтийн бодлого”-той уялдуулан хөгжүүлэх зорилттой ажиллаж байна” гэв.   

Эх сурвалж: www.polit.mn