Т.БАТСАЙХАН

Бүгд найрамдахчуудын олон улсын хүрээлэнгээс Олон нийтийн санал бодлын судалгааг явуулж, өчигдөр үр дүнг танилцууллаа.  Тус судалгааг энэ оны гуравдугаар сарын 1-нээс дөрөвдүгээр сарын 26-ны хороонд зохион байгуулж, Монгол Улсын 18 болон түүнээс дээш насны 2500 иргэнийг түүврийн аргаар сонгон хамруулжээ.  Ингэхдээ компьютер,  утсаар  ярилцлага хийх аргаар судалгааны мэдээллийг цуглуулсан байна. Судалгаагаар улс оронд тулгамдаж буй тэргүүн асуудал, сонгуулийн тогтолцоо, засгийн газар, улс төрийн нам болон бусад институцүүдийн талаар олон нийтийн санал бодлыг судалснаас гадна авлига, мэдээллийн эх сурвалж, улс төр, нийгмийн үнэт зүйлс болон хувь хүний эрх чөлөөний талаарх иргэдийн байр суурийг тандаж судалжээ. 
Судалгааны үр дүнгээс онцлон танилцуулахад, иргэдийн олонх улс орны эдийн засаг, авлигын асуудалд санаа зовниж буйгаа илэрхийлжээ.  Нэн ялангуяа улс оронд тулгамдаж буй хамгийн чухал асуудлуудын талаар асуухад дийлэнх нь эдийн засагтай холбоотой асуудлуудыг нэрлэжээ. Тухайлбал, хамгийн олон дурдагдсан гурван хариултад үнийн өсөлт, амьжиргааны өртөг гэж иргэдийн 58 хувь, ажилгүйдэл гэж 26 хувь, эдийн засгийн бусад ерөнхий асуудлууд гэж 14 хувь нь хариулжээ.  Өнгөрсөн онд  явуулсан санал асуулгад иргэдийн 34 хувь нь эрүүл мэндийн үйлчилгээ, цар тахлыг Монголд тулгамдаж буй хамгийн чухал асуудлууд хэмээн нэрлэж байсан бол энэ жилээс эдийн засгийн асуудалд санаа зовниж эхэлжээ. 

Түүнчлэн иргэдийн 74 хувь нь авлигыг маш ноцтой асуудал гэж үзсэн бөгөөд уг асуудлыг шийдвэрлэх институцүүдэд итгэх итгэл нэн доогуур байгааг судалгааны үр дүнгээс харж болохоор байна.  Иргэдийн 64 хувь нь Авлигатай тэмцэх газар, 66 хувь нь шүүх байгууллага, 62 хувь нь Улсын их хурлын талаар сөрөг хандлагатай байдгаа илэрхийлжээ. 

Мөн төр засгаас  гарч буй шийдвэрүүдэд энгийн иргэд нөлөөлөх боломжтой юу гэх асуултад 80 хувь нь нөлөөлөх боломжгүй хэмээн хариулжээ. Бүгд найрамдахчуудын олон улсын хүрээлэнгийн Ази, Номхон далайн бүсийн захирал Жоанна Као “Монголчууд өнөөгийн эдийн засгийн байдал, авлигатай тэмцэх төр засгийн хүчин чармайлтад сэтгэл дундуур байгааг судалгааны үр дүн тод харуулж байна” гэж тэмдэглээд, “Сонгуульт албан тушаалтнууд эдгээр тулгамдсан асуудлуудыг шийдвэрлэх илүү дорвитой арга хэмжээг түргэн авах шаардлагатай” гэв.  Түүнчлэн,иргэдийн 67 хувь нь ардчилал бол засаглалын хамгийн сайн хувилбар гэж үзсэнийг судалгааны үр дүн онцлов. 

Жоанна Као энэ талаар “Монголын ард иргэдэд тулгамдаж буй асуудал нэлээдгүй бий ч иргэдийн дийлэнх олонх нь ардчилсан засаглалд итгэл хүлээлгэж буй нь олзуурхууштай.   Хариуцлага, ил тод байдал, улс төрийн үйл явц дахь олон талт байдлыг нэмэгдүүлснээр төрөөс улс орны хөгжлийг зөв замд нь чиглүүлэхэд томоохон түлхэц болно” гэлээ. 

Эх сурвалж: "Зууны мэдээ" сонин

2022 ОНЫ НАЙМДУГААР САРЫН 11. ПҮРЭВ ГАРАГ. № 153 (6885)