С.САРАНТУЯА

Модель болох сонирхолтой охид, бүсгүйчүүдтэйгээ Themodels шоуны шилдэг оролцогчдын нэг Б. Хатан-Эрдэнийг уулзуулж байна.

-Сүүлийн үед урлаг соёл, загварын шоу их болсон. Шоунд оролцохын тулд ямар шалгуурыг хангах ёстой вэ. Яагаад загварын ертөнцөд хөл тавих болов?

-Хаалттай шалгаруулалтад ордог. Ярилцлага болон алхаагаа шалгуулсан. Би их эрэгтэйлэг хүн. Гэхдээ өсгийтэй гутал өмсөхөөрөө өөрийгөө шал өөрөөр мэдэрдэг. Хүмүүсийн анхаарал над дээр ирж, биеэ цэхлээд тайзны голоор алхана гэдэг бол миний хувьд хамгийн сайхан мэдрэмжүүдийн нэг учраас энэ чиглэлийг сонгосон. Цаашдаа ч гэсэн мэргэжлээсээ илүү моделиороо ажиллах сонирхолтой.

- Шоунд орсноор ямар боломж бий болсон бэ. Хандлага, хүсэл мөрөөдөл тань өөрчлөгдсөн үү?

 - Агентлагт сурч төгссөн ч холбоотой байгаагүй болохоор өмнө нь зураг авалтад орж байгаагүй. Хамгийн анхны зураг авалтаас эхлээд төгсгөл хүртлээ суралцсаар байгаад дууссан. Зураг авалтын тал дээр маш их мэдлэг туршлага олж авсан. Хандлага өөрчлөгдөөгүй гэж бодож байна. Гэхдээ хамгийн гол зүйл бол гайхалтай охидууд байсан. Өрсөлдөхөөс илүүтэй гэр бүл шиг байж, бие биеэ дэмжиж, сайхан дурсамжуудыг бүтээлцэж, сайн найзууд болсон. Нэвтрүүлгийн хором бүр хөгжилтэй, адал явдал, гэнэтийн зүйлээр дүүрэн байсан.

 - Хоёрдугаар байранд орсон шүү дээ. Тухайн үед ямар мэдрэмж төрж байв?

 -Миний хамгийн дахин давтагдашгүй мөчүүдийн нэг. Яг тухайн мөчид шоуны туршид болсон бүх дурсамжууд нүдний өмнө харагдаж байсан. Өөрийнхөө үздэг, мөрөөддөг байсан нэвтрүүлэгт оролцоод энэ хүртэл явсандаа баярлахын зэрэгцээ айх мэдрэмж төрсөн. Энэ туршлага надад ялагч болохоос илүү сайхан бас үнэ цэнтэй байсан. Тэр өдрийг бүтээхэд маш олон хүний зүрх сэтгэл, хүч хөдөлмөр, хичээл зүтгэл гээд олон зүйл нөлөөлсөн болохоор бүгдэд нь чин сэтгэлээсээ баярлаж талархсанаа илэрхийлье. Намайг дэмжиж, итгэж байсан хүмүүстээ баярлалаа гэж хэлмээр байна.

-Шоунд орохдоо юуг анхаарах хэрэгтэй вэ. Цаашид энэ чиглэлээр явахыг хүсэж байгаа хүмүүст зөвлөгөө өгөхгүй юу?

-Шоунд оролцох хүсэлтэй охидод хандаж хэлэхэд өөртөө илүү итгэлтэй, өөрийгөө хайрладаг байгаарай. Мөн зорилгоо ухамсарлаад хийе гэсэн бүхнээ илэрхийлээрэй. Ичиж санаа зовж болохгүй шүү. Өөрийнхөө урам зориг эрч хүчийг битгий үгүй хийгээрэй. Чамд  өөрөө ч мэдэхгүй маш олон чадварууд байдаг шүү. Модель хүн тэвчээртэй, хувьсаж, өөрчлөгдөх бэлэн байх хэрэгтэй. Шоу бол миний амьдралд маш олон боломжийг болгосон. Бас өөрийгөө илүүтэй таньж мэдсэн гэж боддог.

Эх сурвалж: www.polit.mn