Н.НАМУУН 

 “Вертекс Майнинг Партнер” ХХК нь Хөгжлийн банкнаас авсан 33 тэрбум төгрөгийн зээлээ төлсөн талаар өнөөдөр “Үндэсний мэдээллийн төв”-д мэдээлэл хийлээ.

  Тус компани нь 2020 оны нэгдүгээр  сард “Вертекс Майнинг Партнер” ХХК нь Хөгжлийн банкнаас Ухаа худаг төслийн уурхайн хөрс хуулалтын үйл ажиллагааг өргөтгөх, техникийн хүчин чадлыг нэмэгдүүлэх” зорилгоор 33 тэрбум төгрөгийн зээл авч байжээ. Зээлийн гэрээний дагуу 2024 онд зээлээ төлж дуусгах хуваарьтай байсан ч өөрсдийн нөөц бололцоогоо ашиглан зээлээ хугацаанаас нь өмнө буюу өнгөрсөн сарын 28-нд зээлээ бүрэн төлжээ.

Энэ талаар “Вертекс Майнинг Партнер” ХХК-ны уул уурхай хариуцсан захирал Н.Батбаатар “Бид 2017 оноос Монгол улсын нүүрсний экспортыг нэмэгдүүлэх чиглэлээр уул уурхайн үйлчилгээний салбарт үйл ажиллагаа явуулж байна. Манай компани нь туслан гүйцэтгэгч компаниудын хамтаар 500 гаруй ажлын байр бий болгож, улсад 23.5 тэрбум төгрөгийн татвар хураамж төлсөн. Мөн дотоодын бэлтгэн нийлүүлэгч компаниудаас 230 тэрбум төгрөгийн худалдан авалт хийгээд байна. Хөгжлийн банк нь зээлийн хорооныхоо зургаан  сарын зээлийн судалгааг үндэслэн ТУЗ-ын хурлаараа баталгаажуулж дараах шалгууруудыг хангаснаар  зээл олгох шийдвэр гаргасан. Тухайлбал, өмнө нь хөгжлийн банк болон гадаад дотоодын банкнуудаас авсан зээлийн сайн түүхтэй. Төсөл нь хөгжлийн банкны бодлогын дагуу буюу экспортыг нэмэгдүүлэх чиглэлтэй Барьцаа хөрөнгө нь зах зээлийн үнэлгээгээр гурав дахин их юм. Хөгжлийн банкны бусад зээлийн хүүтэй харьцуулахад харьцангуй өндөр хүү болох жилийн 13%-ийн хүүтэй байх хэлцлийг манай компани хүлээн зөвшөөрсөн. Түүнчлэн манай компанийг зээл авах үед улс төрийн ямар ч албан тушаал хашдаггүй байсан, одоогийн УИХ-ын гишүүн Хассуурийн Ганхуягийг тухайн үед улс төрийн өндөр албан тушаал хашиж байсан мэтээр манай компанитай холбож байгаад харамсаж байна” гэлээ.

Эх сурвалж: www.polit.mn