Н.НАМУУН
Дотор, уламжлалт зүү төөнүүр заслын их эмч, анагаах ухааны доктор Ц.Хулан амьд зөгийн эмчилгээний талаар зөвлөж байна. Түүний үүсгэн байгуулсан “Шидэт зөгий” эмнэлэг нь 2007 оноос үйл ажиллагаагаа явуулж эхэлсэн.
“Зөгийн эмчилгээ хүний амьдралын чанарыг дээшлүүлдэг”
-Зөгийн эмчилгээ маш олон давуу талтай. Нэгдүгээрт, зөгийн эмчилгээ хийлгэснээр хүний бүх эрхтэн зэрэг сэргэдэг. Энэ нь эдийн засаг талаасаа ч хэмнэлттэй. Тухайлбал, хүний дархлаа сэргэнэ, яс бэхжинэ, бэлгийн чалх сайжирна. Мөн үргүйдлийг эмчилж болдог. Хоёрдугаарт, хүний амьдралын чанарыг дээшлүүлэх ач холбогдолтой. Нойр, амт, үнэр, сонсгол, хараа, ой тогтоолт сайжруулдаг. Тэгэхээр зөгий эмчилгээ нь эдийн засгийн болон эрүүл мэндийн хувьд үнэхээр ашигтай эмчилгээ юм.
“Эмчилгээний явцад 40 төрлийн ашигтай бодис хүний цусанд ордог”
-Зөгийний гол онцлог бол өвчин намдаахдаа сайн. Манай эмнэлэгт ирж байгаа хүмүүсийн ихэнх нь мэдрэлийн олон төрлийн асуудалтай байдаг. Тэр тал дээр нь илүү анхаарч ажилладаг. Мөн алдагдсан мэдрэлийн системээ сэргээлгэхээр ирж байна. Мэдрэл, яс ургалт, үе мөч, зүрх судас, артерын даралт, судас хатуурах, арьсны бүх төрлийн өвчний үед илүү ашигладаг. Эмчилгээний зөгийнүүд маань 40 төрлийн бодисыг хүний арьсанд суулгана. Биеийн аль ч хэсэгт хатгасан бүх бие организмд нөлөөлдөг эмчилгээ байдаг.
“10-аас доош насны хүүхдэд хориглодог”
-Зөгийн эмчилгээний талаарх олон улсын эрдэмтдийн хурал хоёр жил тутамд болдог. Энэ жилийн хурал удахгүй Турк улсад зохион байгуулагдах гэж байна. Хамгийн сүүлийн үеийн судалгаагаар манай эмчилгээ хавдар болон ДОХ-ын үед зөгий эмчилгээг хийдэг боллоо. Тэгэхээр вируст бас нөлөөлж байгаа гэсэн үг. Тиймээс зөгийн эмчилгээнд хориглох заалт гэж байхгүй болж байна. Одоогоор 10-аас доош насны хүүхэд болон элэгний хатуурал, сүрьеэ, хавдрын үед зөгийн эмчилгээ хийхгүй байгаа. БНХАУ-д энэ чиглэлд 8000 ортой, хавдрын том эмнэлэг ажиллаж байгаа.
Зөгийн эмчилгээг бусад аргуудтай хавсарвал үр дүнтэй
Зөгийн эмчилгээний үр дүн шууд гардаг. Зөвхөн зөгийн эмчилгээ бус эм тариа, бариа засал, физик эмчилгээтэй зөгий эмчилгээгээ хавсарч хийхэд илүү үр дүнтэй байдаг. Манайх эмчилгээ хийдэг зөгийгөө Сэлэнгэ аймгийн Шаамар сумаас авдаг. Судлагдсан зөгий буюу “Балт” зөгийг эмчилгээндээ ашиглаж байна. Ерөнхийдөө зүү тавьдаг цэгүүд дээр зөгийгөөрөө хатгадаг. Уламжлалт эмчилгээгээр бол зөгийгөө зүүний оронд ашиглаж байна гэсэн үг.
Монголд зөгийн эмчилгээ дэлгэрээсэй
-Төр засгаас дэмжлэг үзүүлдэг бол энэ салбар илүү хөгжих боломжтой. Зөвхөн зөгийгөөр эмчилнэ гэхэд олон өвчнүүдийг зэрэг анагаах боломжтой байгаа нь том давуу тал юм. Олон жил суралцаж, хөрөнгө мөнгө, цаг хугацаагаа зарсан ажлыг маань төрөөс дэмжээд өгвөл сайхан байна.
Эх сурвалж:www.polit.mn