Б.ДАРЬСҮРЭН

Улаанбаатар хот болон орон нутгаас Хөвсгөл аймгийн Хөвсгөл нуурын байгалийн цогцолборт газарт нэвтрэх хэсгийн пост дээр QR код бүхий самбарууд байршуулах ба зорчигчид тус кодыг гар утсаараа уншуулан түр замуудын талаарх дэлгэрэнгүй мэдээллийг урьдчилан авах бүрэн боломжтой юм. БОАЖЯ-ны харьяа Азийн хөгжлийн банкны санхүүжилтээр хэрэгжиж буй “Тогтвортой аялал жуулчлалыг хөгжүүлэх” төслийн хүрээнд Хөвсгөл нуурын байгалийн цогцолборт газрын гурван чиглэлд нийт 37.9 км хатуу хучилттай авто замын барилгын ажил хийгдэж байгаа юм. Хатгал-Жанхай-Тойлогт чиглэлийн 30.4 км автозам дагуу гурван байршлыг, Хатгал-Хүзүүвчийн шил-Ашихай чиглэлийн 5.5 км автозам дагуу хоёр байршлыг хаасан. Харин тус хэсэгт түр зам гарган ажиллаж байгаа аж.

Хөвсгөл нуурыг зорих гадаадын жуулчин, дотоодын аялагч, амрагчдын урсгал эрс нэмэгдэж буйтай холбогдуулан замын хөдөлгөөний аюулгүй байдлыг хангах зорилгоор түр замуудын дагуу хөдөлгөөний тэмдэг, тэмдэглэгээ хийх, хөдөлгөөн зохион байгуулагчийг ажиллуулж байна. Мөн “Байгаль орчны менежментийн төлөвлөгөө”-нд тусгасан арга хэмжээний хүрээнд орчны бохирдлыг бууруулах, тоосжилт үүсэхээс сэргийлж үндсэн болон түр замуудын засварын ажлын явцад өдөрт таван удаагийн давтамжтайгаар нийт 50 тонн усаар усалгаа хийх ажлыг хуваарийн дагуу явуулж байна гэж БОАЖЯ-наас мэдээллээ.

Эх сурвалж: www.polit.mn