Б.ДАРЬСҮРЭН

Самбуугийн гудамжны авто замд 2009 онд их засварын ажил хийгдсэнээс хойш ээлжит болон засварын ажил хийгдээгүй. Харин энэ сарын 27-ноос эхлэн засварын ажлыг эхлүүлсэн. Энэ ажлыг хоёр хэсэгт хуваан гүйцэтгэх аж. Тодруулбал, Гэсэр сүмийн уулзвараас Хүнсний I дэлгүүрийн уулзвар, Хүнсний I дэлгүүрийн уулзвараас Байгалийн түүхийн музейн зүүн урд талын уулзвар хүртэлх автозамыг засварлах юм.

Гэсэр сүмийн уулзвараас Хүнсний I дэлгүүрийн уулзвар хүртэлх хэсгийн шинэчлэлтийн ажлын хүрээнд одоогоор тэгш байдал алдагдсан, суулт үүссэн авто замын чулуун хашлагыг асфальтбетон хучилтын түвшинд тааруулан засварлах, зорчих хэсгийн тэгшилгээний үе болон инженерийн шугам сүлжээний худгийн тагийн түвшинг тааруулах ажил хийгдэж байна. Харин зорчих хэсгийн асфальтбетон хучилтын ажлыг ирэх сарын 1-нээс 6-ны хооронд хийхээр төлөвлөсөн гэж Нийслэлийн Замын хөгжлийн газраас мэдээллээ. Тухайлбал, ирэх сарын 1-нээс 4-ний 05:00 цаг хүртэл Гэсэр сүмийн уулзвараас Хүнсний I дэлгүүрийн уулзварын хойд хэсэг, долдугаар сарын 4-ний 05:00 цагаас долдугаар сарын 6-ны 05:00 цаг хүртэл замын урд хэсгийн хөдөлгөөнийг хязгаарлан суурь, өнгө асфальтбетон хучилтын ажил гүйцэтгэх юм.

Иймд иргэд жолооч та бүхэн дээрх хугацаанд бусад замыг сонгон хөдөлгөөнд оролцоно уу.

Эх сурвалж: www.polit.mn