Д.ГЭРЭЛЦЭЦЭГ

Канад улсын Гадаад хэргийн сайд Жон Бэйрдийн айлчлал маргааш эхэлнэ.

Түүний айлчлал Канад улсын Гадаад хэргийн сайдын төвшинд Монголд хийх анхны айлчлал болж буйгаараа онцлог юм. Айлчлалын тухайд Ерөнхий сайд Н.Алтанхуяг, Гадаад хэргийн сайд Л.Болдтой хэлэлцээ хийнэ. Монголчуудын хувьд хүлээлттэй байгаа нэг зүйл бол Уул уурхайн сайд Д.Ганхуягтай хийх уулзалт. Чухам энэ уулзалтаас уул уурхайтай холбоотой асуудлуудад манай улсад ашигтай хэлэлцээ хийж чадах эсэх нь хамаарах юм. Жон Бэйрд нэлээд туршлагатай залуу улстөрчийн тоонд ордог юм байна.

Тэрээр улстөрийн гараагаа 1985 онд Консерватив намын гишүүн болсноор эхлүүлсэн түүхтэй. Тухайн үед Жон Бэйрд 16 настай байсан гэдэг. Үүний дараа буюу 1990-ээд оны үед Үндэсний батлан хамгаалахын сайд Пэррин Бэттигийн туслах, улс төрийн ажилтан болжээ.

1995-2005 онд Онтариогийн хууль тогтоох ассамблейд ажиллаж байсан бөгөөд хуулийн салбарт чамлахааргүй туршлага хуримтлуулсан гэлцдэг. 2000 оны үед тэрээр Байгаль орчин, Тээвэр зуучлал зэрэг хэд хэдэн яамны сайдын албыг хашиж байсан юм.  Түүний эдийн засгийн хэмнэлттэй байж, эрчим хүчээ хэмнэх, байгаль орчноо хамгаалж ногоон байгууламжийг дэмжсэн олон ажлууд  үр дүнтэй болж байжээ. Үүний зэрэгцээ Жон Бэйрд хүүхдийн эрх, ижил хүйстнүүдийн эрх болон гэрлэлтийг хуулиар хамгаалах асуудалд хүчтэй байр суурь илэрхийлдэг нэгэн. Тэгвэл ижил хүйстнүүдийг дэмжиж байгааг нь шүүмжлэх хүн цөөнгүй байдаг байна. Түүний гаргасан зарим шийдвэр нь гадны орныхонд Жон Бэйрдийг эрс шийдэмгий, хүчтэй харагдуулдаг ч байж болох талтай гэнэ. Тиймээс түүнийг зарим улсын ерөнхий сайд, улс төрийн хүрээнийхэн “зоригтой удирдагч” хэмээн нэрлэдэг. Тэрээр 2010 онд Гадаад хэргийн үүрэг гүйцэтгэгч байсан бол 2012 онд Гадаад хэргийн сайд болжээ.

 Жон Бэйрд улс төрийн рейтингээрээ ерөнхийлөгчийнхөө дараа буюу хоёрдугаарт жагсдаг эрхэм юм байна. Улс төр дэх нөлөөллийн хувьд ч нэлээдгүй хүчтэйд тооцогддог гэнэ. Сонирхуулахад Канадын Гадаад хэргийн сайд 1997 оноос цагаан хоолтон болсон бөгөөд зөвхөн загасны мах иддэг ажээ.